ONCEk 21.000 euroko saria banatu du Markina-Xemeinen
Mi dia izeneko jokoaren bidez eman du saria Miguel Angel Aja Raposo Markina-Xemeingo ONCEren banatzaileak.
Miguel Angel Aja Raposo ONCEren banatzailea. Argazkia: ONCE Euskadi Joan den eguenean [apirilak 8] zozkatu zuten Mi dia izeneko jokoaren bidez 21.324 euroko saria eman du Miguel Angel Aja Raposo ONCEren banatzaileak. Konbinazio irabazlea honako hau izan da: 02 Feb 1925 (data) eta 05 (itzulketa).
Mi dia izeneko jokoa eguenero zozkatzen da, eta 100 urteko epearen barruan dauden 36.525 datetatik bat aukeratu behar da. Gainera, konbinazio bakoitzak, automatikoki ematen den 1 eta 11 bitarteko zenbaki bat izaten du. Hainbat sari-kategoria daude, konbinazio osoa edo zati bat asmatzen den kontuan hartuta. Kasu honetan data osoa asmatu eta sari nagusia eraman dute irabazleek. Guztira, kategoria horretako bi irabazle egon dira, bata Markina-Xemeinen saldu zen zenbakiaren jabea, eta bestea, Velez-koa (Malaga, Espainia). Bi irabazle horien artean banatu da sari nagusia, eta bakoitzari 21.324 euro egokitu zaio.
Markina-Xemeingo banatzaileak azaldu duenez, makinatik ateratako zenbaki bat da, eta saria banatu zuela ere ez zuen jakin bere nagusiak deitu zion arte. “Agian tokatu zaionak ere ez daki irabazi duenik, niregana ez da etorri behintzat”.
Joan den eguenekoa Ajak ematen duen mota horretako lehenengo saria izan da. Izan ere, orain dela gutxi jarri du ONCEk martxan zozketa mota berri hau. Guztiak kontuan hartuta, berriz, ematen duen 7. saria izan da oraingoa.
