Kopa jokatzen hasi dira Lea-Artibaiko futbol taldeetako gazteak eta kadeteak
Apirilaren lehen asteburuan hasi ziren jokoan, eta hirugarren jardunaldia jokatuko dute datorren asteburuan.
Aurrera futbol taldearen aurtengo partida bat. Argazkia: Aurrera Kirol Elkartea Osasun egoera dela eta, aurten ezin izan dira ohiko futbol partiduak jokatu, eta liga bertan behera gelditu da hainbat mailatan. Hala ere, Bizkaiko federazioak kopa lehiaketa bat antolatu du, eta Lea-Artibaiko futbol taldeetako gazteak eta kadeteak parte hartzen hasi dira horretan.
Apirilaren lehen asteburuan hasi zen kopa martxan; beraz, 2. jardunaldia jokatu dute maila ezberdinetan neurtzen ari diren eskualdeko taldeek azken asteburuan.
Ermua Aren kontra jokatu du kanpoan asteburu honetan Gazteen lehentasun mailako Lekeitio A taldeak. Lehen jardunaldian bezala garaipena lortu dute Lekeitioko gazteek Ermuko taldeari 1-4 irabazita. Lehen jardunaldian 2-0 irabazi zioten Bermeori. Durangoko Cultural Bren kontra dute hurrengoko hitzordua Larrotegin, zapatuan [apirilak 17] 11:00etan.
Lehen jardunaldian atsedena edukita, asteburu honetan sartu da jokoan, Gazteen lehenengo mailan jokatzen duen Ondarroako Aurrera Futbol Taldeko taldea. Garaipenagaz hasi dute kopa; 3-1 irabazi zioten Bermeo Bri Zaldupen. Ermuan jokatuko dute hurrengo, domekan [apirilak 18], 11:00etan.
Maila onagaz hasi da Markina-Xemeingo Artibai Futbol Taldeko gazteen 2. mailako taldea ere, 6-1 eta 1-3 emaitzekin nagusituz. Lekeitio Bri irabazi zioten lehen jardunaldian eta Arripu gainditu dute bigarrenean. Lekeitio Bk ere bigarren jardunaldirako indarrak hartu ditu, eta Berrizko taldeari 4-1 irabaztea lortu dute. Lekeitio Bk Larrotegin dauka hurrengo partida domekan [apirilak 18], 17:00etan Abadiño Cren kontra. Artibaik, berriz, zapatuan [apirilak 17] dauka partida 12:30ean, Durangoko Arripausueta zelaian, Ezkurdiren kontra.
Kadeteak. Bestalde, eskualdeko hiru talde ari dira jokatzen Kadeteen lehentasun mailako kopa: Artibai, Aurrera eta Lekeitio A. Eta hirurek galdu dute bigarren jardunaldiko partida: 0-5 galdu du Lekeitiok Abadiño Aren kontra, emaitza berdinagaz galdu du Artibaik ere Arratia Aren kontra, eta 3-1 galdu du Aurrera Ak Gernikaren kontra. Lehenengo jardunaldian hobeto ibili ziren Lekeitio A eta Aurrera A. 0-1 irabazi zuen Lekeitio Ak eta 3-3 berdindu zuen Aurrera Ak; Artibaik 0-6 galdu zuen, ordea.
Datorren domekan [apirilak 18] Elorrio A izango du aurkari Lekeitio Ak, 10:30ean Larrotegi zelaian; Aurrerak ere domeka goizean jokatuko du Abadiño Aren aurka, 12:30ean Abadiñon, eta zapatuan [apirilak 17] neurtuko dira, ostera, Artibai eta Gernika A, 16:00etan, Barroetan.
Berriatuko eta Lekeitio B ari dira lehiatzen kadeteen 2. mailako kopa. Garaipen bi kateatu ditu Berriatukok kopari hasiera emateko: 0-2 irabazi zio Gernika Sporting taldeari eta 8-1 Iurretako Bri. Azken talde horren aurka jokatu du Lekeitio Bk ere 1-6 irabaziz. Asteburu honetan jarri dira martxan lekeitiarrak, lehen jardunaldian atsedena eduki zuten. Datorren asteburuan aurrez aurre aurkituko dira eskualdeko talde biak. Zapatuan [apirilak 17], 11:00etan, jokatuko da Berriatuko eta Lekeitio Bren arteko partida Berriatuko Ibarra zelaian.
