EMAk bidea eman dio Janssenen txertoari, odolbilduak "albo ondorio oso ezohikoak" direla frogatuta
Txertoaren eta tronbosi kasuen artean "lotura bat" egon daitekeela uste du Sendagaien Europako Agentziak, baina berretsi du "onurak arriskuak baino askoz ugariagoak" direla.
Ebazpena eman du EMA Sendagaien Europako Agentziak, eta, AstraZenecaren txertoarekin egin modura, Janssenen prototipoa txertatzearen alde azaldu da. Amerikako Estatu Batuetan azaleratutako odolbildu kasuak aztertu ditu erakundeak, eta, horien eta txertoaren artean “balizko lotura bat” egon daitekeela iritzita ere, albo ondorio horiek “oso ezohikoak” direla ondorioztatu du.
Zehazki, zortzi odolbildu kasu atzeman dituzte, orain arte jarritako zazpi milioi dositan. Hori dela eta, txertoaren onurak «balizko arriskuak baino askoz ugariagoak» direla ondorioztatu du EMAk, eta ez dio txertoari inongo baldintzarik edo oztoporik jarri, prospektoan odolbilduen arriskuen berri emateaz harago.
