Markina-Xemein, Hiri Dantzaren erritmora
Uhagon kulturguneak antolatuta, Dantza Urbano edo Hiri Dantza tailerrak eta erakustaldia egon ziren zapatuan [apirilak 17] Markina-Xemeinen.
Elements Dance Studio taldearen emanaldia Herri Biblioteka aurrean. Argazkia: Uhagon Kultur Elkartea Markina-Xemeingo Herri Biblioteka aurrea dantzariz bete zen joan den zapatuan [apirilak 17]. Dantza Urbanoa edo Hiri Dantza (hip-hop, popping, house, breaking…) ezagutu eta ikasteko aukera egon zen lehendabizi, eta Elements Dance Studio taldearen erakustaldiaz gozatzeko aukera, ondoren.
Uhagon kulturguneak antolatutako tailerrek arrakasta handia eduki zuten. Plaza guztiak bete ziren, eta gustura aritu ziren parte hartzaileak dantzan.
Herri Biblioteka aurrean bertan eman zuten tailerra. Talde txikietan banatuta pausoak ikasten aritu ziren adin ezberdinetako parte hartzaileak, eta amaieran, guztiek batera koreografia bat osatzeko aukera eduki zuten.
Ikusle asko batu ziren baita ondorengo erakustaldirako ere, 100 bat lagunera mugatutako aforo guztia bete zen.
Dantzaren Eguna. Jendearen erantzunagaz “pozik” geratu dira antolatzaileak. Azaldu dutenez, apirilaren 29an ospatzen den Dantzaren Egunaren harira antolatu dute ekimena. “Urtero dantza ikastaroetako ikasleek ikuskizun bat eskaintzen dute egun horri begira, baina egoera honetan ezinezkoa da hori antolatzea”, azaldu dute. Izan ere, 50 ikasletik gora dabiltza dantza ikastaroetan, eta horien ikuskizun bat segurtasunez egitea ez dute bideragarri ikusten. “Horrelako ikuskizun bat antolatzea ezinezkoa da momentu honetan; ikasle asko daude eta horiek ikustera joaten den jende kopurua ere oso handia da”.
Hori dela eta, Dantzaren Egunari keinu bat egin nahirik, ekitaldi berezia antolatu eta Hiri Dantzen erritmoa ekarri dute herrira.
