Markina-Xemeingo abesbatzak Goiko Portalean elkartu dira "abestu nahi dutela" aldarrikatzeko
2020ko azarotik daramate entsegatu ezinik, eta kantatzea "segurua dela" diote. Abesbatza askok ateak itxiko dituztela ikusten dute.
Markina-Xemeingo Abesbatzen elkarretaratzea Markina-Xemeinen. Kantuz bai, ixilik ez kanpainagaz bat eginez, Goiko Portalean elkartu ziren domekan [maiatzak 2] Markina-Xemeingo hiru abesbatzetako kideak –Xemein Abesbatza, Xemein Gazte Ahots Abesbatza eta Emeki Korala– abesbatzek bizi duten egoera kaleratzeko.
Pare bat minutuko isilunearen ostean, Euskal Herrian Federatutako abesbatzek adostutako manifestu korala irakurri zuten Markina-Xemeingo abesbatzetako kideek. Manifestu horretan dionez, abesbatza gehienak 2020 urteko azarotik elkartu ezinik daude, eta beste kirol eta kultur jarduera batzuk bezala, entsegu koralerako jarduerara itzuli nahi dute.
“Abestu nahi eta behar dugu”, diote abesbatzek eta “segurtasun neurriak betetzen badira kantatzea segurua dela” gaineratzen dute. Egoerak horrela jarraituz gero, koruetako askok ateak betirako itxiko dituztenaren beldur ere badira, eta zuzendarien familiak diru sarrerarik barik daudela gogora ekarri dute. “Abesbatzen jarduera arrisku handikoa dela ikusten bada, aplika ditzagun aurreikusitako neurriak, bidera ditzagun kontrolatzeko moduak, alda ditzagun neurriak, nahikoak ez direla ikusten bada, baina ez dezagun sistemaz kantu korala debekatu”.
Ahotsaren Nazioarteko Egunean [apirilak 16] ixilik egoteari itxi eta jarduera eskubidea aldarrikatzeko kanpainari hasiera eman zioten abesbatzek. Bide horretan ekintza ezberdinak egiteko asmoa daukatela adierazi dute, eta iragarritako ekintza horietako lehenengoa izan da domekakoa. Markina-Xemeinez gain, hiru hiriburu nagusietan eta beste hainbat herritan ere egin ziren elkarretaratzeak, denak ordu berean.
Adin guztietako koralistak elkartu ziren Markina-Xemeingo ekitaldian, abestu nahi dutela adierazteko, eta txalo zaparradagaz amaitu zuten ekimena.
