Urkulluk lege dekretu bat onartuko du neurriak alarma egoerarik gabe ere mantentzeko
Dekretua maiatzaren 10ean sartuko litzateke indarrean, eta lau edo sei aste arteko balioa izango luke.
Nahiz eta maiatzaren 9tik aurrea alarma egoera indarreaz ez egin, ezarritako neurri murriztaileak mantenduko ditu Eusko Jaurlaritzak. Horretarako, Iñigo Urkullu lehendakariak esan du barikuan [maiatzak 7] onartuko dutela neurriak egoera berrira moldatzeko balioko duen lege dekretua. Dekretua maiatzaren 10ean sartuko litzateke indarrean, eta lau edo sei aste arteko balioa izango luke.
Urkulluren arabera, lege dekretuak egun indarrean dauden arauak mantentzeko balioko du, «beti ere Jaurlaritzak dituen gaitasunen barruan». Argi utzi du ezin direla neurriak leundu, ez bada behintzat aldaketa handirik gertatzen pandemiaren bilakaeran.
Dena den, Urkulluk beste behin eskatu dio Madrili alarma egoera luzatzeko. Esan du oraindik geratzen direla egun batzuk igandera arte, eta baduela itxaropena Sanchezen gobernuak jarrera aldatzeko. Sei hilabete daramatza indarrean alarma egoerak.
Jaurlaritzak egungo neurriak mantentzen baditu, litekeena da haien legezkotasuna auzitegietan erabakitzea. Izan ere, alarma egoerari esker, oinarrizko hiru askatasun debekatzen dituzten neurriak daude orain indarrean: besteak beste, etxeratze agindua, mugikortasunaren debekua eta elkartzeko debekua. Alarma egoeraren legezko babesik gabe, zail edukiko du Jaurlaritzak debeku horiek mantentzea.
