Lea-Artibaiko atletek 23 domina lortu dituzte Euskadiko Txapelketan
Eskualdeko sei atleta Euskadiko txapeldun geratu dira. Lekeitioko Tximista taldekoek 13 domina irabazi dituzte, eta Durango KTn dauden Lea-Artibaiko atletek 10.
Argazkia: Tximista atletismo taldea 18 eta 20 urtez azpiko Euskadiko Atletismo Txapelketan garaipen handiak lortu dituzte Lea-Artibaiko hainbat atletek. Durangoko Landako pistan zapatuan [maiatzak 8] lehiatutako txapelketan, Lekeitioko Tximista taldekoek 13 domina irabazi zituzten, eta Durango Kirol Taldean dauden Lea-Artibaiko atletek 10. Horien artean, eskualdeko sei atleta podiumen gorenera igo ziren.
Tximistakoei dagokienez, 18 urtez azpikoetan, Naia Garetxana Urkidi txapeldun geratu zen altueran (1,59m) eta jauzi hirukoitzean (11,57m). Maila bereko mailu jaurtiketan igo zen podimuaren gorenera Mikel Odiaga Irusta (23,14m).
Horrez gainera, bosna zilarrezko eta brontzezko domina eskuratu zituen klub lekeitiarrak. 18 urtez azpikoetan, Alaine Imaz Kortazarrek bi zilarrezko domina irabazi zituen (luzera eta pisu probetan), eta Nora Zatika Belaustegi (400 m hesiak) eta Leire Alonso Kortazar (pertiga) ere bigarren sailkatu ziren. 20 urtez azpikoetan, Nora Agirre Castrok (xabalina) zilarrezko domina jantzi zuen.
Zilarraz gain, Alonsok bi brontze lortu zituen, 10,6n-ko markagaz pisu jaurtiketan eta 30 metro xabalinan, eta baita maila bereko Jule Arkotxa Arratek ere (3.000 m-ko eta 1.500 m-ko lasterketetan). 20 urtez azpikoetan, berriz, Terese de Madariaga Landa pisu jaurtiketan sailkatu zen hirugarren.
Durango KTn dauden Lea-Artibaiko atletek zazpi urrezko domina irabazi zituzten. Etxebarriako Sarai Larrinaga Lejardi txapeldun geratu zen pisu jautiketan, xabalinan eta disko jaurtiketan (sub 18). 20 urtez azpikoetan, Aulestiko Xabat Oar-Arteta Urkidik luzeran eta 400 m hesi proban lortu zituen urrezko domimak. Halaber, maila bereko Sara Asenjo Arrien eta Izaro Aranburu Rementeria aulestiarrak ere txapeldun geratu ziren, Asenjo pisu jaurtiketako onena izan zen eta Aranburu 3.000 m-ko lasterketan. Asenjok, gainera, zilarrezko domina irabazi zuen disko jaurtiketan.
18 urtez azpikoetan, Urtza Agirre Lertxundi ondarrutarra bigarren sailkatu zen 800 m-ko lasterketan. Bestalde, 20 urtez azpikoetan, Igor Jaio Bustindui aulestiarra hirugarren sailkatu zen.
