Andrabandaren argazkiak batzen hasi dira, dokumental bat egiteko
Ondarroako Andrabanda Feministak 10 urte betetzen ditu aurten. Eta urteurren borobil horren harira, dokumental bat prestatzen ari dira.
Ikus-entzunezkoa osatzeko Ondarroako perkusio taldearen argazkiak behar dituzte, eta hori eskuratzeko herritarren laguntza eskatu dute. Taldearen argazkiren bat dutenei irudiak andrabanda@gmail.com posta elektronikora bidaltzeko eskatu dute. Argazkiak ez ezik, bestelako materiala ere ongietorria izango dela esan dute. “Norbaitek bideoren bat badauka posta elektroniko horretan jasoko dugu”.
Dokumentalaz gain, hamargarren urteurrena ospatzeko egun berezi bat ere antolatzeko asmoa agertu dute Andrabandako kideek. Jai horretan herriko kaleak hartuko dituzte, betiere, COVID-19ak ezarritako arau eta protokolo guztiak beteta. Jai horri buruzko informazioa laster zabalduko dute.
