Aitxekutz Saria lehiatzeko 111 txirrindularik izena eman dute
Zapatuan egingo dute junior mailako lasterketa. Berriatuan hasi eta amaituta, 100 km-ko ibilbidea egingo dute txirrindulariek. Aurrekoetan ez bezala, Bustinzuri kalean egongo da helmuga.
Berriatuko 39. Aitxekutz Saria. 20. Juan Luis Kanterape Memoriala lehiatuko dute zapatuan [maiatzak 22], 15:30ean hasita. Junior mailako proba da, eta 111 txirrindularik izena eman dute. Hego Euskal Herriko parte hartzaileak dira gehienak, eta Kantabriako eta Zaragozako txirrindulariak ere ariko dira lehian. Parte hartzaileen artean Ondarroa Aurrera Txirrindulari Klubeko hiru kide daude: Peru Aldazabal, Mikel Arrasate eta Aiert Txurruka.
100 km-ko lasterketa da, eta honako ibilbidea egingo dute: Berriatua-Plazakola-Milloi-Oleta-Lekeitio-Ondarroa-Berriatua-Plazakola-Milloi-Oleta-Lekeitio-Ondarroa-Berriatua-Plazakola-Milloi-Oleta-Lekeitio-Mendexa-Ondarroa-Berriatua.
Berriatuko Txirrindulari Elkartearen kideek gogoratu dute nahiz eta alarma egoera indarrean ez egon, COVID protokoloa betetzea derrigorrezkoa dela, eta beraz, iaz egin modura, Cikautxoren aparkalekuan burbuila eran egongo dira parte hartzaileak. Bertatik hasiko dute proba, eta helmuga, ostera, Bustinzuri kalean egongo da. Lasterketa ikuslerik barik lehiatuko dute, beraz, helmugan ere ezingo da jenderik pilatu. Sari banaketa ekitaldia Cikautxoren aparkalekuan egingo dute, eta euria balego, udaletxean, ateak itxita.
Antolakuntzatik eskatu dute hasierako eta amaierako burbuilak errespetatzeko, eta horrekin batera, lasterketan laguntzen egongo diren boluntarioei eskerrak eman dizkiete.
