Arrakastatsua izan da Mutrikuko Kultur Aniztasunaren Astea
Herriko errealitate kultur anitza nabarmendu asmoz, Kultur Aniztasunaren Astea ospatu berri dute Mutrikun. Herritarrek ondo erantzun dutela eta ekintzetan parte hartu dutela esan du udalak; balorazio positiboa egin dute.
Mutrikuko Kulturartekotasun topaketa. Argazkia: Mutrikuko Udala. Lehendabizikoz egin duten Kultur Aniztasunaren Astea berriro errepikatzeko asmoa agertu du Mutrikuko Udalak. “Taldea lanerako gogo handiz dago, hau lehendabiziko pausoa da. Herriko Kulturartekotasun eta Bizikidetza taldeari sekulako indarra eman dio honek guztiak”.
Eguenetik [maiatzak 20] domekara [maiatzak 23] bitartean egin dituzten ekintzetan ikusgarriena zapatuko [maiatzak 22] Kulturartekotasun topaketa izan zen. Txile, Senegal, Bulgaria, Paraguai eta Marokotik etorritako mutrikuarrek euren jatorriko kulturaren erakusleiho bihurtu ziren postuak ipini zituzten Goiko Plazan. “Jende asko gerturatu zen, eta postuak ipini zituzten herritarrak oso gustura egon ziren. Euren herriko kontuak, dantzak, ohiturak, argazkiak, musika… erakutsi zizkieten bertaratuei”.
Mutrikuarren jatorri ezberdinak erakusten dituen mapak ere zapatuan Goiko Plazara joan ziren herritar askoren arreta beraganatu zuen. Gainontzeko ekintzak ere bereziak izan zirela esan dute. «Egueneko hitzaldia, barikuko solasaldia eta domekako antzerkiak gaur egungo egoera hobeto ezagutzeko aukera eman digute, eta asko dagoela egiteko ikustarazi digute. Bat baino gehiago barrena ikututa atera ziren hiru ekintza horietatik».
