Berrerabili daitezkeen hondakinak uzteko beste edukiontzi bat ipini dute Mutrikun
Edukiontzia Puerto Jaitsiera kalean ipini dutela esan dute. Horretan arropak, liburuak edota jostailuak utzi daitezkeela diote.
Gaur egun sortzen diren hondakinen kopurua murrizteko helburuari jarraituta, Debabarreneko Mankomunitateak berrerabili daitezkeen hondakinak uzteko beste edukiontzi bat ipini du Mutrikun, portura jaisteko bidean, Puerto Jaitsiera kalean. Zehaztu dutenez, edukiontzi horrek arropak, liburuak edota jostailuak uzteko balio du. “Guztira, Debabarrena osoan mota horretako 35 edukiontzi daude”.
Bestalde, Mankomunitateak azaldu du 2020an tamaina handiko 776 tona hondakin bildu zirela eskualdean. “Tamaina handiko hondakinak dira, esate baterako, birziklatu daitezken egurrezko altzariak, berrerabili edo birziklatzen diren etxetresna elektrikoak eta energetikoki berbalorizatzen diren koltxoiak”.
Hondakin horiek guztiak garbiguneetara eraman edo Mankomunitateak herritarren eskura jartzen duen bilketa zerbitzua erabiliz edukiontzien irletan utzi behar direla azpimarratu dute. Hondakin horiek adierazitako ordutegi eta egunetatik kanpo uzteak “irudi txarra” eman eta “bilketa zailtzen” dutela diote. “Garrantzitsua da herritarrek ordutegia errespetatzea. Hondakin horiek 20:30etatik 21:30etara jasotzen dira, astelehenetan Mallabian, Ermuan eta Eibarren eta eguenetan Soraluzen, Elgoibarren, Mendaron, Deban eta Mutrikun”. Dena dela, tamaina handiko hondakinak atera beharra badago, aldez aurretik Mankomunitatera deitu behar dela (943-70 07 99) gogorarazi dute. “Horrek bilketak antolatzeko aukera ematen du”.
Argitu dute kalean hondakinak nahastuta daudela iruditu arren, Mankomunitateak tamaina handiko hondakin horiek bereizi egiten dituela. “Gure baliabideak erabiltzen ditugu bilketa bereizia egiteko eta hondakinen berrerabilpena edo birziklapena sustatzeko”.
Azkenik, gogorarazi dute tamaina handiko hondakinekin batera ezin direla atera pintura boteak, aerosolak, inausketa hondakinak edota obra txikietako hondakinak (komunak, azulejoak, hodiak edota bestelako hondakinak).
