Sexu aholkularitza zerbitzua aurkeztu dute Mutrikun: HelduLeku
Doako arreta zerbitzua eguaztenero emango dute Konde kalea 18. zenbakiko kontsultategian. Aurrez aurreko kontsultez gain, telefonoz eta Internet bidez ere emango dute arreta.
Ane Urkiri Mutrikuko Gazteria zinegotzia eta Miren Aiertza Mutrikuko sexu aholkularitza zerbitzuko sexologoa, zerbitzuaren aurkezpenean. Herritarrei sexu aholkularitza eta kalitatezko sexu hezkuntza zientifikoa eskaintzeko helburuarekin sortu du zerbitzu berria Mutrikuko Udalak. Doako arreta zerbitzua eguaztenean [maiatzak 26] hasiko dira ematen eta azpimarratu dutenez, herritar guztiei zuzenduta egongo da. Hau da, helduentzat ez ezik, nerabe eta gazteentzat ere eskainiko dute zerbitzua.
Harremanak Hezkuntza Elkarteak kudeatuko du zerbitzua, Miren Aiertza Odriozola sexu aholkularitza zerbitzuko psikologoaren eta sexologoaren ardurapean. Aurrez aurreko kontsultak astean behin eskainiko dituzte Konde kalea 18. zenbakiko kontsultategian eta zehaztu dutenez, eguaztenero 17:00etatik 19:00etara zabalik egongo da kontsultategia. Egun eta ordu berean, gainera, kontsultak telefonoz (943-60 34 18) egiteko aukera ere egongo da. Kontsultak Internet bidez egiteko era ere zabaldu dute. “Asteko edozein egunetan helduleku@gmail.com posta elektronikora edo gure Instagram eta Facebook kontuetara idatzita egin daitezke kontsultak”.
Miren Aiertza zerbitzuaz arduratuko den sexologoa eta Ane Urkiri Gazteria zinegotzia, zerbitzua emango duten bulegoaren atarian.
Zerbitzua zerbait zabala izango dela nabarmendu du Aiertzak. “Sexu aholkularitza honetan ez gara sexu portaeretaz eta praktiketaz ariko bakarrik. Harremanak eta emozioen kudeaketara bideratuta ere egongo da zerbitzua”. Gaineratu duenez, aholkularitza bat izango da, ez terapia egiteko leku bat. “Heziketa pertsonalizatu bat eta terapia labur baten arteko zerbait izango da. Hainbat gauza zehatzetatik haratago landu daitezkeen gaiak landuko ditugu hemen”.
Adierazi dutenez, “konfidentzialtasun osoz” sexualitatearekin zerikusia duten askotariko gaiei buruz aholkatuko diete norbanakoei zein bikoteei. “Sexuak eta bikote harremanek merezi duten osasuna berreskuratzeko lekua da HelduLeku. Bikote harremaneko arazo eta kezka, nerabezaroko kezka, seme-alaben jokabide eta norbanakoaren arazo zein kezkei erantzuna emango zaie. Sexu identitatea, sexu orientazioa, pertsonaren sexu erantzuna, garapen emozionala, pertsonen arteko erlazioak, erotika eta beharrekin zerikusia duen guztia landuko da, beti ere kontsulta egiten duen pertsonaren edo bikotearen momentu ebolutiboa aintzat hartuta”.
