Andoni Burgoa hirugarren sailkatu da Euskadiko Urpeko Arrantza Txapelketan
Ondarroan lehiatu duten txapelketan herriko klubeko Andoni Burgoa sailkatu da hirugarren, Ander Bergara laugarren eta Jonathan Beitia hamazazpigarren.
Argazkia: Ondarroako Urpeko Elkartea. Zapatuan eta domekan [maiatzak 29 eta 30] jokatu da Ondarroan Euskadiko Urpeko Arrantza Txapelketa, eta Andoni Burgoa ondarrutarra hirugarren sailkatu da. 36 arrainegaz (1.275 kilo) 66.630 puntu lortu zituen Burgoak. Bizkaiko txapeldunak irabazi du Euskadiko Txapelketa ere, Getxo Sub klubeko Sergio de Julianek. 82.665 puntugaz geratu zen txapeldun (45 pieza eta 1.495 kilo). Bermeoko Izaro Sub klubeko Lander Aurrekoetxea geratu zen txapeldunorde. Bermeotarrak 37 pieza harrapatuta (1.500 kilo), 68.690 puntu bildu zituen.
Zortzi klubetako 22 parte hartzailek lehiatu dute asteburuan txapelketa, eta Ondarroako Urpeko Elkarteko Ander Bergara laugarren eta Jonathan Beitia hamazazpigarren sailkatu dira. Bergarak 66.440 puntu lortu zituen eta Beitiak 32.920 puntu. Izaro Subeko Yaiza Romero izan da txapelketako emakumezko bakarra.
Bi egunez arrantzatutako piezak Greziako Lesbosen dauden errefuxiatuei otorduak ematen dizkien Zaporeak elkarteari eman dizkiete.
