Joseina Malvido ondarrutarrak maila ona erakutsi du Espainiako txapelketan
Ondarrutarra marka pertsonala hobetuta bueltatu da etxera. Pisu jaurtiketan 16 zentimetrotan hobetu du marka.
Joseina Malvido ondarrutarra Espainiako atletismo txapelketa lehiatzen. Argazkia: Gotzon Garcia. Asteburuan Albaceten jokatu den Espainiako atletismo egokituko pista txapelketan emaitza onak eskuratu ditu Basauriko Ascensores Bertako-Javi Conde taldeko Joseina Malvido ondarrutarrak. Ondarrutarra, gainera, marka pertsonala hobetuta bueltatu da etxera.
Bi diziplinatan parte hartu zuen: 100 metroko lasterketan eta pisu jaurtiketan. Abiadura lasterketa 9. postuan amaitu zuen; 15,87 behar izan zuen proba amaitzeko. Pisu jaurtiketan 10. postuan amaitu zuen; bere marka pertsona 16 zentimetrotan hobetu zuen: 6,62 metroko marka lortu zuen.
Basauriko Ascensores Bertako-Javi Conde taldea, gainera, hirugarren urtez jarraian Espainiako talde onena izan da. Javi Conde taldeko arduradunak pozik daudela azpimarratu du. “Zaila zirudien arren, emakumezkoetan zein gizonezkoetan talderik onena izan gara. Horrek aurrera begira lanean jarraitzeko indarra eta bultzada ematen digu”.
Basauriko Ascensores Bertako-Javi Conde taldea Espainiako talderik onena izan da. Argazkia: Gotzon Garcia.
