Turismoa erakartzeko kanpaina bat egingo dute Lekeition
Kanpaina martitzenean [ekainak 1] jarriko dute martxan. Bi alditan banatuta egingo dute, eta bi hilabeteko iraupena edukiko du.
Udalerriko eskaintza eta baliabide turistikoak ezagutzera emateko kanpaina berezia jarriko dute martxan martitzenetik [ekainak 1] aurrera Lekeition. Udara begira turismoa sustatzea du helburu kanpainak, eta bi hilabeteko iraupena izango du.
Kanpaina bi alditan banatuta dago. Lehenengoa ekainaren 1etik uztailaren 31ra artekoa izango da, eta horretan Euskal Herriko, Madrilgo eta Herrialde Katalanetatik datorren turismoa sendotzea izango dute helburu. Bigarren aldia, berriz, irailekoa eta urrikoa izango da, eta urtarokotasunagaz hautsi eta turismo denboraldia luzatzea da asmoa. “Lekeitioko kokaleku paregabeak, itsasoa, tradizioa, natura, gastronomia, turismo aktiboa, kalitatezko ostatuak edota zerbitzu anitzen eskaintza izango dira kanpainarako sortu diren bideoen ardatza”, azaldu dute.
Leloa. Batzen gaituena da leloa jarri diote kanpainari: “Leku ederrak, sentipenak eta, batez ere, itsasoari lotutako bizitzeko modu bat. Guzti horiek leku berean biltzen dira, guztiok batzen gaituena dira, hain zuzen, Lekeitio eta itsasoa, eta hori izango da kanpainaren leloa“.
Jakitera eman dutenez, Lekeitiok jasotzen dituen bisitari gehienak Euskal Herrikoak, Herrialde Katalanetakoak eta Madrilgoak izaten dira, hori dela eta, kanpaina indartsuagoa egingo dute lurralde horietan bisitariak erakartzeko. Baina, beste leku batzuetara ere zuzenduko dira: “bisitari potentzialak izan daitezkeen lekuetara, inguruko erkidegoetara eta Frantzia hegoaldera besteak beste”.
Azaldu dutenez, kanpainaren oinarria Lekeitioko turismo orrialdea izango da: “Bertan Lekeitioko informazio guztia aurkitu ahalko da, Non lo egin, Non jan edo Zer bisitatu atalen bidez”. Era berean sare sozialak ere indartuko dituzte, Facebook, Twitter eta Instagram kontuen bidez erabiltzaileengana heltzeko. “Lekeitioturismo markaren bidez turistengana hurbildu eta Lekeitio ezagutzeko aukera guztiak jarriko dira haien eskuetan”.
