Pentsiodunen mugimenduak "indartsu" dagoela erakutsi du
Antolatzaileek emandako datuen arabera 450 pertsona batu dira Ondarroako manifestazioan eta beste 250 lagun Lekeition. Hego Euskal Herriko Pentsiodunen Mugimendua udazkenerako beste protesta bateratu bat prestatzen hasi da.
Zapatuan Ondarroako kaleetan zehar egin zen manifestazioa. Ehunka manifestarik parte hartu zuten zapatuan [maiatzak 29] Euskal Herriko Pentsiodunen Mugimenduak Hegoaldeko lau hiriburuetan eta beste zenbait herritan egindako mobilizazioetan. Lea-Artibai eta Mutrikuko pentsiodun mugimenduak ere “indartsu” dagoela erakutsi du beste behin ere. Ondarroan eta Lekeition egin ziren mobilizazioak “arrakastatsuak” izan direla esan dute; antolatzaileek emandako datuen arabera 450 pertsona batu ziren Ondarroan eta beste 250 Lekeition.
Ondarroako manifestazioa Zaldupeko zubian hasi zen 12:30ean. Manifestazioaren buruan Lea-Artibai eta Mutrikuko pentsiodunen lau pankarta joan ziren, eta horien atzetik bi zutabetan banatuta joan ziren Alamedaraino, pentsio publiko eta duinen aldeko oihuak eginez. Lekeition ere, ordu berean batu ziren udaletxe aurreko eskaileretan. Ordu laurdeneko elkarretaratzearen ostean, alde zaharreko eta portu inguruko kaleetatik zehar manifestazioa egin zuten Amorotoko eta Mendexako herritarrekin batera; kolektiboaren eskakizunez gain, mediku kontsultak herrietan mantentzeko eskatu zuten.
Lekeitioko manifestazioa portutik igarotzen.
Manifestazioen amaieran euren ohiko aldarrikapenekin jarraitzen dutela azpimarratu zuten. Hiru urteko mobilizazioen ondoren ere “pentsio publiko duinen” eskaerari eusten diotela eta mesfidati daudela esan zuten. “Salatu nahi dugu hiru urteko mobilizazioen ondoren lortutakoak, arriskuan daudela eta ez dela urrats sendorik ematen pentsio publikoak, duinak, bidezkoak eta nahikoak bermatzeko”.
Zapatuko mobilizazioa “helmuga eta abiapuntu berri bat” izan dela gaineratu du Hego Euskal Herriko Pentsiodunen Mugimenduak, eta egungo politikak ez balituzkete aldatuko, udazkenean erakunde sozial eta sindikalekin batera mobilizazio orokor bat antolatuko luketela iragarri dute. “Mobilizazioa da bermea, eta horrela jarraituko dugu gure helburuak lortu arte”.
