Txapeldunen Liga bat bereganatu duen lehen ondarrutarra da. Arrizabalagak jokatzen duen Chelsea taldeak 1-0 irabazi dio Manchester Cityri.
Marcos Alonso eta Kepa Arrizabalaga, Txapeldunen Ligako garaikurragaz. Argazkia: Kepa Arrizabalaga Twitter Atezain ondarrutarrak Ingalaterrako Chelsea taldeagaz irabazi du txapelketa (talde urdinak bigarrenez eskuratu du belarri handia). Zapatuan [maiatzak 29] Portoko (Portugal) Do Dragao estadioan jokatu zen finalean 1-0 irabazi zioten Pep Guardiolak zuzentzen duen Manchester City taldeari.
Txapeldunen liga bat bereganatu duen lehen ondarrutarra izan da, gainera. Atezain ondarrutarra 2018ko abuztuan ailegatu zen Londresko taldera, eta taldeagaz irabazi duen bigarren titulu nagusia izan da; duela bi urte Europako Liga txapelketa ere irabazi zuen taldeak.
Ondarrutarra finala jokatzeko aukerarik barik geratu zen (Edouard Mendy sendatu ostean haren ordezkoa izan zen), baina, hala ere, gogotsu ospatu zuen garaipena. Ondarrutarrak bere Twitter kontuan elkarbanatu duen mezu labur eta esanguratsuaren arabera, “egi bihurtu den amets bat” da zapatuan lortutako titulua.
Finalari dagokionez, ondarrutarraren taldea, oro har, nagusi izan zen berdegunean. Lehen zatian baloiaren kontrol nabarmena eduki zuten eta Kai Havertzek 42. minutuan egindako golak partidua erabakita laga zuen. Atsedenaldiaren ostean, Manchester City partiduaren kontrola hartzen saiatu bazen ere, ezin izan zuen Chelsearen defentsa hautsi eta egoera irauli.
Arrizabalaga kuadrillako lagunekin garaipena ospatzen. Argazkia: Aurrera Kirol Elkartea.
Chelsea taldea kopa altxatzen. Argazkia: Chelsea FC
