Auzo Taxi zerbitzua martxan ipini dute Aulestin
Astelehen, eguazten eta barikuetan 09:30etik 13:30etara eskaintzen dute zerbitzua. Txartela udaletxeko idazkaritzan eskuratu behar da.
Aulestiko Udalak herritarrentzako Auzo Taxi zerbitzua martxan ipini du. Astelehen, eguazten eta barikuetan, 09:30etik 13:30etara eskaintzen dute zerbitzua (abuztuan ez da egongo zerbitzurik).
Herrigunera hurbiltzeko eta handik etxera bueltatzeko aukera ematen die zerbitzuak aulestiarrei, bertan dauden oinarrizko zerbitzuak erabiltzeko edota garraio publikoa hartzeko: “Azkar, merke eta modu iraunkorrean joan-etorriak egiteko aukera ematea da helburua, eta horrez gain, baita lurralde oreka nahiz udalerriko mugikortasun iraunkorra indartu ere”. Erabiltzaile bakoitzak bidai bakoitzean bi euro ordaindu behar ditu. Hau da, joan-etorriak bi bidai moduan hartzen dituzte, beraz, joan-etorriagatik lau euro ordaindu behar dira. Erabiltzaile bakoitzak egunean bi bidaia egin ahal ditu.
Aulestin erroldatuta dauden edo Aulestin bizi diren adin nagusiko pertsonek erabili dezakete, eta 18 urtetik beherakoak gurasoen edo legezko tutorearen baimenagaz. Zerbitzua erabiltzeko txartela udaletxeko idazkaritzan eskatu behar da, 09:00etatik 14:00etara. Txartela eskuratzean euro bat ordaindu behar da.
Behin txartela jasota, taxian joan-etorriak egiteko telefono zenbaki honetara deitu behar dute herritarrek: 608 87 65 98 (Eneko). Zerbitzua ahalik eta “modu eraginkorrenean bermatu eta antolatu” aldera, zerbitzua erabiltzeko aurrez jakinarazi behar zario taxi gidariari. Erabiltzaileak beragaz adostu behar du bidaia aurreko eguneko 19:00ak baino lehen.
Zerbitzua erabiltzen dan bakoitzean derrigorrez erakutsi behar zaio txartela taxilariari, erabiltzailearen nortasuna egiaztatu dezan.
