Oriok eta Hondarribiak eraman dituzte Lekeitioko Banderak
Oriok nahikoa eroso menderatu zuen txanda eta Hondarribia ere gogor aritu zen. Ondarroa eta Isuntza zazpigarren eta hamaikagarren geratu ziren, hurrenez hurren.
Emakumeen X. bandera eraman duen Orio. Argazkia: Lekeitioko Udala Indarrak neurtu eta ligarako berotzen hasteko aukera eduki dute asteburuan Euskal Herriko traineruek Lekeition. Lekeitioko uretan jokatu da traineruen denboraldi-aurreko lehen test handia. Nesketan Lekeitioko X. bandera Oriorentzat izan da, eta mutiletan berriz, Hondarribiak eraman du Lekeitioko 42. bandera.
Oriok, 3. kaletik, nahikoa eroso menderatu zuen txanda, eta ziabogan 5 segundoko aldea atera zion Donostiarrari, 9 segundo Hondarribiari eta 11 segundo Arraun Lagunaki. Oriok ia 10 segundora handitu zuen Donostiarrarekiko aldea helmugan, Hondarribia hirugarren geratu zen 13 segundora eta Tolosaldea, berriz, laugarren, Arraun Lagunaken aurretik.
Ondarroak bigarren txandan eta Isuntzak lehenengoan egin zuten arraun; zazpigarren geratu zen Ondarroako trainerua eta 11. Lekeitiokoa.
Gizonezkoak. Emakumeen lehia amaituta, gizonezkoen txandei ekin zitzaion. Lau txandatan aritu ziren, eta azkenengoan erabaki zen estropada. Emakumezkoetan Oriok egin zuen modura, Hondarribiak ere bere asmoak argi erakutsi zituen Lekeitioko uretan. Ama Guadalupekoak Orio, Zierbena eta Bermeorekin batera egin zuen arraun, eta hiru ziabogetan hiru marka onenak lortu zituen, Bermeo eta Zierbena atzetik zituela.
Gizonezkoen 40. Banderako irabazlea, Hondarribia. Argazkia: Lekeitioko Udala
Hondarribiaren atzetik, Zierbena izan zen azkarrena azken luzean. Urdaibai gainditu zuen eta bigarren geratu zen Hondarribiarengandik 6 segundora. Bermeok 13 segundo galdu zituen, Donostiarra laugarren geratu zen sailkapen orokorrean 24 segundora eta Orio bosgarren 34 segundora.
Emakumeen sailkapeneko postu berdinak eskuratu zituzten eskualdeko gizonezkoen traineruak ere: zazpigarren geratu zen Ondarroako trainerua 48 segundora eta 11. Lekeitiokoa minutu bat eta ia 10 segundoko aldeagaz. Busturialdea izan zen azkena, irabazlearengandik minutu eta 47 segundora geratu zen.
Arraun girorik ez da faltako Lekeition. Lekeitioko Banderagaz gainera, beste lau estropada egongo dira uztailean:
- Uztailak 11. ETE emakumeen ligako estropada
- Uztailak 14. Bizkaiko traineru txapelketa
- Uztailak 21. Euskadiko traineru txapelketa
- Uztailak 25. TKEko traineru estropadak
