Irailaren 19a da VI. Benito Ansola sariketara lanak aurkezteko azken eguna
Lehiaketan 18 eta 36 urte bitarteko (biak barne) gazteek parte hartu dezakete. Aurtengo Euskal Zine Bileran jakinaraziko dute zein den bekaren irabazlea, eta hark 10 hilabete edukiko ditu proiektua garatzeko.
Oier Fuentes zuzendaria, 2019ko Euskal Zine Bileran Benito Ansola Bekaren saria jasotzen. Argazkia: Zine Bilera Euskaltzaleen Topaguneak antolatuta, Benito Antsola Sariketaren helburua da 18-36 urte bitarteko gazteei euskarazko ikus-entzunezko lanak ekoizteko bidea zabaltzea. Sari banaketa bi urterik behin egiten da Euskal Zine Bileraren baitan, eta asteon jakinarazi dute irailaren 19a dela lanak aurkezteko azken eguna. Euskal Zine Bilerako arduradunek lehiaketan parte hartzera animatu dute: “Ez galdu zuen filmak ezagutzera emateko aukera paregabe hau!”.
Irabazleak 3.000 euro jasotzen ditu eta hamar hilabetetan proiektua gauzatu eta Euskal Zine Bileran estreinatzen da. Hala, aurten lehiaketa irabazten duenak, 2022ko Euskal Zine Bileran aurkeztuko du proiektua; bekaren irabazlea zein den aurtengo Euskal Zine Bileran esango dute.
Saridunak. Ondokoak izan dira lehiaketa irabazi duten zuzendari batzuk: David Zabala, Paul Urkijo, Aitor Gametxo, Joseba Ubeguraga, Maider Fernandez, Maria Elorza eta Ruben Rosas. Azpimarratu dute sariketa hori irabazi duten “askok bide oparoa” egin dutela beka irabazi zutenetik.
