Puntua egingo dute Lekeition, indarkeria matxista salatzeko
Abaroa parkean izango da ekitaldia, zapatuan [ekainak 12]. Espazio Publikoan Ehuntzeko Nazioarteko Egunaren harira antolatu dute ekimena.
Zapatuan [ekainak 12] Espazio Publikoan Ehuntzeko Nazioarteko Eguna izango da, eta horren harira, #Puntuetakitto ekimena jarri dute martxan Bizkaia, Gipuzkoa eta Arabako 14 tokitan, indarkeria matxistaren inguruko drama ikusarazteko. Eta, Lekeition ere, #Puntuetakitto jarriko diote indarkeria sexistari 11:00etatik 13:00etara Abaroa parkean egingo duten ekitaldian.
Jakitera eman dutenez, parkean batzen direnek puntua egingo dute, eta ehundutako zati guztiak Astigarragako Matazak Indarkeria Sexistaren aurkako mugimenduak 8 urtetan sortu duten 7 kilometroko lepoko kolektiboari gehituko zaizkio. Mugimenduak ehun zatiak batuko ditu, indarkeria sexisten aurkako loturarik handiena eta mundialena lortzeko.
Jai giroan gauzatuko den ekitaldiaren helburua emakumeen artean belaunaldien arteko loturak sortzea, emakumeei eta eremu pribatuari lotuta egon diren diziplinak eremu publikora ateratzea eta lan horien atzean dagoen jakituria guztia ikustaraztea direla azaldu dute.
Horrez gain, bizilagunen arteko elkarguneak sortu eta hurbiltasuneko harreman afektiboei balioa ematea nahi dute.
