Emeki Koralak kontzertua emango du Markina-Xemeingo Mertzedeko elizan
Ordu erdi inguruko kontzertua prestatu dute ekainaren 27rako. Edukiera mugatua izango denez, kontzertura joan nahi dutenek gonbidapenak hartu beharko dituzte datorren astean Markina-Xemeingo udaletxeko kutxazainean.
Argazkia: Emeki Korala Urte eta erdi inguru zuzeneko kontzerturik eman ezinik egon eta gero, “ilusio handiagaz” itzuliko da berriro agertokira Markina-Xemeingo Emeki Korala. Ordu erdi inguruko kontzertua prestatu dute ekainaren 27rako. Emanaldia 19:00etan izango da, Mertzedeko elizan.
Ohi modura, Antxon Sarasuak pianoarekin lagunduko die, eta Unai Gallastegiren perkusioa ere izango dute oraingoan. Yolanda Loira Emeki Koraleko zuzendariak aurreratu duenez, euskal folklorean oinarritutako piezak, latinezko beste batzuk eta kantu afrikar bat ere eskainiko dituzte. “Ilusio handia egiten digu berriro ere publikoaren berotasuna jaso eta kanten bidez guk eurak alaitzeko aukera izateak. Guztiok batera tarte atsegin bat igarotzea dugu helburu”, azpimarratu du.
Segurtasun neurriak direla eta, edukiera mugatua izango da, eta beraz, kontzertura joan nahi dutenek gonbidapenak hartu behar dituzte aldez aurretik udaletxeko kutxazainean. Gonbidapenak datorren astean egongo dira eskuragarri.
Urte eta erdi. Abesbatzentzako ere azken urte eta erdia oso gogorra izan dela azpimarratu du Loirak. Emeki Koralak esate baterako, 2019an abestu zuten azkenengoz publikoaren aurrean, eta COVID-19 pandemiaren eraginez, 2020ko martxotik 2021eko maiatzera arte aurrez aurreko entsegurik ezin izan dute egin. “2020ko irailean eta urrian elkartu ahal izan ginen, baina egoera okertu eta etxera itzuli behar izan ginen berriro ere Internet bidez entsegatzera”, gogoratu du.
Segurtasun neurriak beteta, beste arlo batzuk martxan hasita bazeuden ere, abesbatzak maiatzera arte ezin izan dira hasi batera entsegatzen. Hala ere, koralisten arteko harremana mantendu asmoz, Internet bidez elkartu dira Emeki Koraleko partaideak, eta abestiak berrikusi eta kanta berriak ikasi dituzte Karmen Jaietan kontzertu bat emateko aukera izango zutenaren itxaropenagaz.
Publikoarekin berriro elkartzeko ilusioak eta gogoak bultzatu ditu kontzertu hau antolatzera, eta eskerrak eman nahi izan dizkiete posible egin dutenei, Markina-Xemeingo Udalari eta Mertzedeko elizari.
