Auzo taxi zerbitzua erabiltzen hasi dira Amoroton, Gizaburuagan eta Mendexan
Auzo taxi zerbitzua erabiltzeko txartelak udaletxeetan eskuratu behar dira. Astelehenetik barikura, 07:30etik 20:00etara eta zapatuetan 09:00etatik 14:00etara eskaintzen dute zerbitzua.
Amoroton, Gizaburuagan eta Mendexan modu bateratuan auzo-taxi edo landa-taxi zerbitzua ipini dute martxan hilabete honetan.
Aurreko astean egin zuten lehenengo bidaia. Mendexako herritar bat izan zen lehenengo erabiltzailea, Baurdo auzotik Lekeitiora joateko eskatu zuen zerbitzua.
Zerbitzua erabili nahi duten bizilagunek aurretiaz auzo-taxi txartela eskuratu behar dute. Eskaera-orriak bete eta udal bulegoetan aurkeztu behar dituzte txartela jasotzeko.
Amoroton, Gizaburuagan eta Mendexan erroldatutakoek herrigunean dituzten oinarrizko zerbitzuak erabiltzeko joan-etorrietarako eta garraio publikoarekin konektatzeko erabili ahal dute auzo taxi zerbitzua eta baita Lekeitiora joateko ere, euren herrian ez dituzten oinarrizko zerbitzuetarako joan-etorriak egiteko. Baldintza batzuk orokorrak badira ere, zein bere udalerrian baldintza zehatzak dituzte.
Astelehenetik barikura, 07:30etik 20:00etara eta zapatuetan 09:00etatik 14:00etara eskatu daiteke zerbitzua. Abuztuan ez dute zerbitzua eskainiko.
