Egungo egoerara egokituta, ekainaren 26an ospatuko dituzte San Pedro Jaiak Munitibarren
Antzerki eta zirku ikuskizunean egoteko eta ginkanan parte hartzeko aldez aurretik izena eman behar da.
Pandemiagatik, aurten ere Munitibarko Kultura eta Jai batzordeak San Pedro jaiak beste formatu batera egokitu ditu. Ekainaren 26an [zapatua] hainbat ekitaldi egingo dituzte.
Rojo Telon antzerki eta zirku konpainiak Nudo ikuskizuna eskeiniko du frontoian, 12:30ean. 17:00etatik aurrera, berriz, umeentzako ginkana egoingo dute Leaktibai-ren eskutik. Mintegi osteko futbol zelaian batuko dira jolasteko.
Aipatu bi ekitaldietarako aldez aurretik izena ematea beharrezkoa da, astelehenetik barikura, 09:00etatik 14:30era udal administrazioan eta 16:00etatik 20:00etara liburutegian. Eguergiko frontoiko emanaldian 50 pertsonako gehienezko aforoa edukiko dute. Ginkanan ez dute gehienezko parte-hartzaile kopururik zehaztu, baina 6 urtetik gorakoei zuzendutako ekintza da, eta ekainaren 22a [martitzena] da izena emateko azkenengo eguna.
Oharrak. Batzordearen kideek egun horretan pirataz mozorratzeko deia zabaldu dute, eta herritarrak 12:00etan herriko plazara mozorratuta hurbiltzera eta jaiei hasiera ematera gonbidatu dituzte.
Kultura eta Jai batzordetik segurtasun neurri orokorrak betetzeko eta arduraz jokatzeko eskatu diete herritarrei. Gogoratu dute udalerrian orain arte egin dituzten ekitaldietan modura, ekainaren 26an ere, udalak idatzitako protokoloan zehaztuta dauden baldintza eta segurtasun neurriak errespetatuz egingo dituztela.
