Ekainaren 26tik aurrera ez da kanpoaldean maskararik erabili beharko
Pedro Sanchez Espainiako presidenteak iragarri du neurri hori. Neurri hori eguenean [ekainak 24] onartuko du Espainiako Ministro Kontseiluak ezohiko bilera batean. 2020ko maiatzaren 21etik izan dira derrigorrezkoak kalean.
Pedro Sanchez Espainiako presidenteak esan du ekainaren 26tik aurrera ez dela izango derrigorrezkoa maskararen erabilera kanpoaldean. Sanchezek azaldu du eguenean [ekainak 24] ezohiko ministro kontseiluaren bilera deituko duela, eta hor hartuko dutela erabaki ofiziala. Gaineratu du puntuz puntu ari direla betetzen Espainiako Gobernuak ezarritako helburuak, eta «herritarren alaitasuna» partekatzen dutela agintari publikoek ere. «Gure kaleak, gure aurpegiak, ohiko itxura berreskuratzen hasiko dira», esan du.
Hamahiru hilabete, maskararekin. Iazko maiatzaren 21ean sartu zen indarrean maskararen erabilera. Aire zabalean eta erabilera publikoa duten espazio itxietan izan zen derrigorrezkoa egun horretatik aurrera, 6 urtetik gorakoentzat; 3 eta 5 urte artekoentzat maskararen erabilera gomendatu egin zuten. Osasun arazoak dituztenak izan ziren beste salbuespena.
Hasieran, bi metroko segurtasun distantzia ziurtatu ezin zenerako agindu zuten, baina gerora ohikoa bilakatu da maskara kalean, mendian eta hondartzan, parkeetan eta terrazetan, udako oporretan zein Gabonetako ospakizunetan.
