Hamabi ikuskizun dakartza Lekeitioko 31. Nazioarteko Kale Arteen Jaialdiak
Hiru gunetan eskainiko dituzte ikuskizunak: Abaroa jauregiko lorategian, plaza beltzean eta eskolako jolastokian. Aforo mugatua egongo da eta sarrerak hartu beharko dira ikuskizunak hasi aurretik.
31. Kalekaren aurkezpena Lekeitioko udaletxean. Kaleko arteak adierazpide dituzten jatorri ezberdinetako hamabi konpainiaren proposamenekin gozatzeko aukera eskainiko du aurten Lekeitioko Nazioarteko Kale Arteen Jaialdiak. 31. Kaleka bizi dugun ezohiko osasun egoerak baldintzatuta dator; jaialdiak egun gutxiago eta ikuskizun gutxiago izango ditu. Baina, bere nortasuna mantendu eta berriro ere jaialdi handi bat eskaintzeko ilusioarekin itzuli da. Gaur [ekainak 18] aurkeztu dute uztailaren 9tik 11ra ospatuko den jaialdia, eta bertan azaldu dituzte egoera berrira egokitzeko egin dituzten moldaketak.
Kaleka kalean ospatu da beti, eta aurten ere hala izango da, baina hesitutako guneak erabiliko dituzte aforoak kontrolpean izateko eta neurri guztiak egoki bete ahal izateko. Horrela, hiru gunetan eskainiko dituzte ikuskizunak: Abaroa jauregiko lorategian, plaza beltzean eta eskolako jolastokian.
Kaleka Nazioarteko jaialdi bat izaten den arren, aurten pandemia dela-eta eremua murritzagoa izan dela azaldu du Koldo Goitia Lekeitioko alkateak. Horrela, Kolonbia eta Txileko konpainiak badaude ere, gehienak Euskal Herrikoak eta ingurukoak izango dira: Herrialde Katalanak, Gaztela eta Leoi, Valentzia eta Madril besteak beste. Kalekak eta udan egiten diren ekimenek udalerriarentzako daukaten garrantzi handia ere azpimarratu nahi izan du alkateak, eta aurrera eramaten laguntzen duten erakundeei –Eusko Jaurlaritza eta Bizkaiko Foru Aldundia– eskerrak eman dizkie.
Jaialdiak kultura hurretik bizitzeko eta esperimentatzeko aukera ematen duela adierazi du, berriz, aurkezpenean parte hartu duen Xabier Arauzo Bizkaiko Foru Aldundiko Euskara Zuzendari Nagusiak: “Tokiko artea ere sustatuz eta zelan ez, kontuan edukita euskara bera”. Baina beste kultura batzuetarako tranpolin lana ere egiten duela gaineratu du: “horrek aberastu egiten gaitu eta kultur agertoki integratzaileenetako bat bihurtzen du. Lekeition eragin positiboa edukitzeagaz gainera, Bizkaian ere eragina dauka. Artista, konpainia zein kolektiboek kulturarekin amets egitera gonbidatzen dituzte Bizkaiko herritar guztiak”.
Askotariko programazioa. Eduki, formatu eta hizkuntza anitzetako dantza, zirkua, clown, keinu-antzerki, esperimentazio espazioa edota piroteknia ikuskizunak ikusi ahalko dira beste batzuen artean aurtengo jaialdian. “Lekeitioko Nazioarteko Kale Arteen Jaialdiaren oinarri nagusietako bat parte hartzea da, artista eta ikusleen arteko harremana bultzatuz. Argi dago, aurtengoan baldintzatuta egongo dela hau, baina modu desberdinak landuko dira ikusleak ere ikuskizunen parte sentiarazteko”, azaldu du Ibon Noya Lekeitioko Udaleko kultur teknikariak. Azken urteetan bezala, Kalekak hiru lan lerro ezberdinduko ditu: Kaleka ofiziala, Kalekaz Blai eta Kaleka Scratch.
Ondokoek parte hartuko dute aurtengo jaialdian: Tiritirantes Circo Teatro, David Moreno Cia & Cristina Calleja, Mireia Miracle Company, Producciones Sansegundo, Mortelo & Manzani, Teatro La Cosa, Nuc, Haatik Dantza Konpainia, Mr Copini eta Visitans konpainiaren lanak batuko ditu.
Kaleka Scratchek garapenen edo sorrera prozesuan dauden lanak batuko ditu, sormenezko elkar trukaketa garatzeko espazioak eskainiz. Sail horren baitan Madrilgo Optimo konpainiaren Minimo Pesimo ikuskizuna eskainiko dute.
Azkenik, Kalekaz Blai atalean aurten, Urdaibaiko Txitatoki Zirko Eskolak parte hartuko du eta zirku tailer irekia eskainiko dute. Txitatokik bost urte darama Urdaibain zirkua irakasten eta oraingoan, erakustaldia emango dutenak bertako ikasleak izango direla jakitera eman dute. “Ostean denok probatu ahal izango ditugu zirkuko teknikak”.
Jakitera eman dutenez, ikuskizun guztiek edukiera mugatua izango dute, eta sarrerak ikuskizunak hasi baino 2 ordu aurretik hartu ahalko dira emanaldia egingo den gunean bertan.
