Chretien izan da azkarrena San Gregorio Sarian
Lea-Artibaiko txirrindularien artean, Beñat Onaindia Arrizabalaga izan da lehenengoa helmugan; hamabosgarren geratu zen sailkapen orokorrean. Eskualdeko bigarrena Egoitz Aranzeta Bilbao izan zen.
Argazkia: Berriatuko Txirrindulari Elkartea. Elite eta 23 urtez azpikoen 40. San Gregorio Saria. VI. Asier Aranzeta Memoriala lasterketa Laboral Kutxa-Euskadi Fundazioko Charles Etienne Chretien txirrindulariak irabazi zuen domekan [ekainak 20]. Euskalduna Txapelketaren denboraldi honetako lehenengo proba izan da.
Lehenengo bi bueltetan ihesaldi saiakerak egon ziren, baina garrantzi gutxikoak. Hirugarren bueltan, Mendexa igotzean apurtu zen lasterketa. 20 txirrindulariko taldeak aurrera egin zuen. Gero, talde hori desegin eta bederatzi txirrindulari ipini ziren lasterketa buruan. Azkenengo bueltan, Mendexara igoera erabakigarria izan zen berriro ere, eta bederatzi txirrindulariko taldea sakabanatzen hasi zen. Asterrikan gora, Baque Team-eko Alex Diaz nahikoa ondo pasatu zen, bigarren edo hirugarren sailkatzeko aukerekin, baina erori egin zen helmugara bidean.
Denen artean Chretien sartu zen lehenengo helmugan; hiru ordu, 11 minutu eta 20 segundotan amaitu zuen 127,2km-ko lasterketa. Irabazlearengandik 26 segundora sartu zen Caja Rural-Seguros RGA taldeko Richard Rolando Huera Eulen taldeko Julen Garciak osatu zuen podiuma, irabazlearengandik 34 segundora amaituta.
Irabazlea helmugaratzen. Argazkia: Berriatuko Txirrindulari Elkartea.
Lea-Artibaiko txirrindularien artean, Beñat Onaindia Arrizabalaga izan da lehenengoa helmugan; hamabosgarren geratu zen sailkapen orokorrean. Eskualdeko bigarrena Egoitz Aranzeta Bilbao bere taldekidea izan zen, eta hirugarrena Eiser-Hirumen taldeko Patxi Juaristi Pagaegi.
Taldekako saria Baque Team-entzat izan zen. Mendiko saria Huerak irabazi zuen, eta tarteko helmugetakoa Mohamed Amine Belabessik.
