Ondarroak bosgarren eta Isuntzak zazpigarren hasi dute ETE Liga
ETE ligan bi estropada lehiatu dituzte asteburuan. KAE 2 Ligan jardunaldi bakarra eduki dute, eta Mutriku seigarren sailkatu da.
ETE, KAE 1 eta KAE 2 Ligak asteburuan hasi dituzte. ETE ligan Tolosaldeak eta Deustuk irabazi dituzte lehen bi jardunaldietako banderak, KAE 1ean San Pedro eta Getaria nagusitu dira zein bere etxean, eta KAE 2an lehiatutako jardunaldi bakarrean, Hondarribia izan da azkarrena.
ETE Ligan Ondarroak bosgarren (14 puntu) eta Isuntzak (10 puntu) zazpigarren postuetan amaitu dute ligako lehenengo asteburua. 21 puntugaz Deusto dago sailkapen buru, Tolosaldeagaz puntuetan berdinduta. Hibaika hirugarren eta San Juan laugarren daude, 17 eta 15 puntugaz, hurrenez hurren.
Tolosaldeko II Ikurriña jokatuz hasi zuten liga, zapatuan [ekainak 19]. 11.26,80 denboragaz nagusitu zen Tolosaldea. Ondarroa seigarren (11.58,40) eta Isuntza zazpigarren (12.01,64) sailkatu ziren.
Atzo [ekainak 20], berriz, txandako azkarrena izan zen Ondarroa, Getariako Andoni Galarragaren oroimen estropadan. Hamar minutu, 57 segundo eta 43 ehunen eginda, laugarren sailkatu zen, eta Isuntza zazpigarrena izan zen (11.123,52). Deustok irabazi zuen estropada, 10.38,63 denboragaz.
Mutriku. Bestalde, KAE 2an, Mutrikuk seigarren postuan hasi du liga. 36. Pasaiako Ikurriña Hondarribiak irabazi zuen zapatuan [ekainak 19] 21 minutu, 39 segundo eta 66 ehuneneko denboragaz. Irabazleaz gain, Portugaletek, Donostiarrak eta Zarautzek amaitu zuten estropada 22 minutu baino gutxiagotan. Mutriku seigarrenak 22 minutu, zortzi segundo eta 32 ehunenetan amaitu zituen lanak.
