Ostalaritza eta kultur jardueren ordutegia 02:00etara luzatu du Jaurlaritzak
Txokoak eta elkarte gastronomikoak zabaltzeko baimena ere eman dute eta kirol ekitaldietan ikusleak sartu ahalko dira, edukiera murrizketekin. 15-20 egunetan berriro aztertuko dituzte irizpideak, "gehiago malgutzeko edo osasun larrialdia bertan behera uzteko".
Ostalaritza eta jarduera kulturalen ordutegia 02:00ak arte luzatu du Jaurlaritzak. Tabernetan sei laguneko taldeetan egon ahal da, bai kanpoan, baita barruan ere. Barruko edukiera, gainera, %50ekoa izango da, eta oraindik ere debekatuta egongo da zutik kontsumitzea. Horrekin batera, txokoak eta elkarte gastronomikoak ere irekitzeko baimena eman dute, ostalaritzarako ezarri dituzten irizpide berdinekin. Hala ere, diskotekak itxita mantenduko dira.
- Kirol jarduerak: instalazioetan hamar laguneko taldetan egotea baimendu du Jaurlaritzak, eta aldageletan %50eko edukiera berreskuratuko da. Eskola kirola ere baimendu dute eta, beraz, udako txapelketak egin ahalko dira.
- Kirol edo kultur ekitaldiak: ikusleak sartzea ere posible izango da, baina beti ere edukiera mugatuarekin: gehienez 600 pertsona egon ahal izango dira barruan eta 800 kanpoan. 1.600 eta 5.000 pertsona arteko edukiera duten esparruetan, berriz, gehiengoa 800era zabaltzen da barnealdean eta 1.200 kanpoan. 5.000 pertsonatik gorako edukiera duten instalazioetan, gehieneko edukiera % 30ekoa izango da.
- Gurtzarako lekuetan, berriz, %60ko edukiera izan ahalko da, eta natur edo kultur jardueretan hogei pertsonako taldeak egin ahalko dira kanpoaldean eta hamarrekoak barruan.
Neurri guztiak zapatuan [ekainak 19] sartu ziren indarrean. Hala ere, lehendakariak argitu du datozen 15-20 egunetan berriro aztertuko dituztela irizpideak, gehiago malgutzeko edo osasun larrialdia bertan behera uzteko.
Arauak malgutuko zirela aurreikus zitekeen; izan ere, Jaurlaritzak iragarri du ez dituela koronabirusaren aurkako osasun neurriak arindu nahi 100.000 biztanleko intzidentzia metatua 150 kasutik behera mantentzen dela baieztatu arte, eta aste honetan, hamar hilabetean lehen aldiz jaitsi da langa horretatik. Zehazki, Bizkaian 100.000 biztanleko 145 laguni atzeman diete COVID-19a azken hamalau egunetan; Araban, 129ri; Gipuzkoan, 127ri. Hegoaldean, Nafarroak du tasarik apalena: 108. Horri gehitu behar zaio jada Hegoaldean biztanleen %50ek hartu dute txertoaren bidezko babesa, dosi bat gutxienez. Pauta osoa jaso dutenen zenbatekoa ere nabarmen ari da hazten: 944.136 dira, herritarren %33.
