Beste urtebete atzeratu dute Ondarroko Erdi Aroko jaia
2022ko irailean ospatuko dute jaia, Ondarroako hiribilduaren 695. urteurrenagaz bat eginda.
Ondarroako Udalak, kultura batzordeko kideekin aztertu ostean, Erdi Aroko jaia 2021ean ez ospatzea erabaki du. Jaia, berez, 2020ko irailean ospatu behar zuten, baina urtebete atzeratu zuten COVID-19arengatik. Egoera ez denez jaia ospatzeko beste hobetu, ospakizuna beste urtebete atzeratzea erabaki dute.
2022ko irailean ospatuko dute jaia, Ondarroako hiribilduaren 695. urteurrenagaz bat eginda. “Ondarroak 1327ko irailaren 28an jaso zuen Maria Diaz de Haro Bizkaiko anderearen eskutik hiri-gutuna. Urteurren horregaz bat eginda ospatuko da hurrengo Erdi Aroko jaia, egun batzuk gorabehera, irailaren 28a martitzena izango baita”. Hurrengoa, aldiz, 2027ko irailean egitea adostu dute, 700. urteurrenagaz bat egiteko.
Aritza Aristondo Natxiondo kultura zinegotziak esan duenez, koronabirusak jaia bera ospatzea ezinezkoa egiteaz gain, antolaketa prozesua “behar modura gauzatzea” ere ezinezko bihurtu du. “Antolaketa lanak batzarretan oinarritzen dira, herritarrak elkartu eta hauen arteko hartu-emanetan; orain arteko egoerak ez du hau egitea ahalbidetu. Antolaketa prozesua, gainera, luzea da, hilabeteetako kontua da, eta zein egoeratatik gatozen ikusita, ezinezkoa da hainbeste jende eta elkarte batzea antolaketa lanetarako”.
Jaia antolatzeko lantalde berezia hilabeteak lehenago hastean da lanean antolaketa lanak behar modura burutzeko. Udalak deialdia egingo du jaia herritar guztien artean antolatzeko.
