Danok Bat bigarren sailkatu da Gipuzkoako Herriartekoan
Zumaiak jantzi du aurten txapela. Mutrikuk gazte mailako puntua eskuratu du eta Zumaiak, aldiz, kadete eta nagusi mailetakoak.
Danok Bateko puntistak, Gipuzkoako Herriarteko Txapelketa jokatu ondoren, sariekin. Argazkia: Danok Bat. Gipuzkoako Herriarteko Zesta-Punta Txapelketa finala 2-1 galdu dute Mutrikuko Danok Bat Pelotazale Elkarteko puntistek. Domekan [ekainak 20] Zumaiako Aitzuri pilotalekuan jokatutako finalean Zumaiak lortu zuen aurtengo txapela; mutrikuarrek gogor borrokatu zuten, baina ez zuten aurkaria gainditzeko aukerarik eduki. Espero zen modura, nagusien mailan erabaki zen norgehiagoka.
Kadete mailan zumaiarrak izan ziren nagusi; Watkinsek eta Agirrek 30-18 irabazi zieten Unax Zubizarretari eta Manex Ansolari mutrikuarrei. Gazte mailan, berriz, Mutrikuren alde izan zen puntua; Eñaut Urreistik eta Eneritz Lizardik 30-14 irabazi zieten Egañari eta Uretari. Nagusi mailako partiduan, azkenik, Zumaia gailendu zen; Agirrek eta Urangak 30-20 irabazi zieten Jon Iparragirreri eta Mikel Manzisidorri. “Finalista biak atzelariak dira, eta gabezia hori igarri egin zen emaitzan. Aurrelaria izan bagenu, irabazteko aukerak izan genitzakeen”.
Mutrikuarrek titulua zazpigarrenez bereganatzeko nahia zeukaten, baina ezin izan zuten aurrez ipinitako helburua lortu. “Espero zen modura Zumaiak irabazi du aurten txapelketa. Zenbait jokalari min hartuta ditugu, eta finalera begira ezin izan dugu guk nahi genuen besteko bikote sendorik osatu”. Finala galdu badute ere, puntistek egindako lanarekin “pozik” daudela esan dute Danok Bateko ordezkariek. “Harrobi talde oso ona dugu. Datorren urtean ere txapela borrokatzeko lehian egotea espero dugu”.
Asteburura begira, beste bost final jokatuko dituzte Danok Bateko puntistek. Gipuzkoako banakako txapelketaren finalean, esaterako, kadete, gazte eta nagusi mailetan ordezkaritza izango dute. Norgehiagoka zapatuan [ekainak 26] 17:00etan hasita jokatuko dute Mutrikuko Miruaitz pilotalekuan. Kadete mailan, Unax Zubizarretak Hondarribiako Rodrigoren aurka neurtu beharko ditu indarrak. Gazte mailan, Zumaiako Gonzaloren aurka jokatuko du Eñaut Urreistik. Nagusi mailan, azkenik, Zumaiako Cosme Agirre izango du aurkari Mikel Manzisidorrek. Euskal Ligako txapelketaren finalerako, berriz, beste bi bikote sailkatu dira.
