Ekaitz Mendizabal kantxetatik kanpo egongo da hiru bat hilabetez
Gaur [uztailak 20] arratsaldean egin diote ebakuntza Donostian. Profesional mailan eduki duen lehen lesio handia da zapatuan [uztailak 17] Mutrikun egin zuena.
Eskuineko bizepsaren beheko aldeko tendoi hausturaren ondorioz, Mutrikuko aurrelaria hiru bat hilabete jokatu gabe egongo dela jakinarazi du Jai Alai enpresak. Goixarri II.ak zapatuan [uztailak 17] Mutrikun jokatu zen Jai Alai Master Series txapelketaren baitan jokatutako partiduan min hartu zuen, bigarren set-ean. “Lekerikarekin batera partidua irabazten zihoan, baina Dania Jai Alaiko pilotariak kantxa utzi behar izan zuen min hartuta”.
Jai Alai enpresaren esanetan, profesional mailan eduki duen lehen lesio handia da zapatuan egin zuena. Gaur [uztailak 20] goizean erresonantzia egin diote, eta probak eskuineko bizepsaren tendoiaren haustura baieztatu du. Arratsaldean bertan egin diote ebakuntza Donostiako Poliklinikan. “Ebakuntza gaurko programatuta zegoen. Atzo traumatologoarekin hitzordua eduki zuen, eta tendoia hautsita egon zitekeela esan zion. Haustura zegoen ala ez baieztatzeko erresontzia egin beharra zegoela esan zioten”, azaldu du Jon Mendizabal Ekaitzen aitak.
Munduko Pilota Batzarrak jakitera eman duenez, hiru hilabeteko errehabilitazioa beharko du. “Oraingoz airean dago errehabilitazioa Mutrikun edo Danian egingo duen. Geroago ikusiko da hori”, gaineratu du.
