Txakartegik Berriatua-Hiru Erregeen Mahaia-Berriatua abentura solidarioa gauzatuko du
Abenturazale berriatuarra barikuan [uztailak 23] abiatuko da Hiru Erregeen Mahaiarantz. Gailurra egin eta gero, domekan [uztailak 25] berriro Berriatuara ailegatuko da. Beste behin ere, Aspanovasen aldeko beste ekintza bat egingo du.
Iazko uztailean #Agertxopirata proiektu solidario arrakastatsua egin eta Aspanovasen alde 12.000 euro batu ostean, Ander Txakartegi abenturazale berriatuarrak berriro ere txirrunduari heldu eta abentura solidario berri bati ekingo dio barikuan [uztailak 23]. Berriatua-Hiru Erregeen Mahaia-Berriatua izango da ibilbidea; 550 kilometro eta 8.000 metroko desnibel positiboa. Eta barikutik domekara [uztailak 25] bitartean gauzatuko du, bidelagunak alboan dituela. Iaz egin modura, Helmugak proiektuaren sortzaile eta sustatzaileak Aspanovasen alde egingo du abentura hau ere.
Barikuan 17:00etan aterako da abenturazale berriatuarra Berriatuko plazatik. “Ez irteeran ez helmugan ez dugu inolako jairik antolatuko”. Berriatutik Linzako (Huesca, Espainia) babeslekuraino joango da Txakartegi bizikletan; 06:00ak alderako iristea aurreikusten dute. Eta beragaz batera joango dira Aitor Antxustegi berriatuarra, Mikel Mote, Oier Aldabaldetreku eta Lander Andonegi mutrikuarrak eta Iñigo Bustindui ondarrutarra. “Linzara heltzen garenean, arropak aldatu, bizikletak albo batean utzi eta 07:00ak aldera mendian gora hasiko gara. Eta mendia igotzeko beste hamar bat berriatuar gehituko zaizkigu”. Txakartegik dioenez, zazpi ordu inguru egingo dituzte mendia igo eta jaisten. “Hori lasai-lasai joanda”.
[EGIN EKARPENA Aspanovasen alde]
Mendia igo eta jaitsi ostean, zapatuko [uztailak 24] 14:00ak aldera, 15:00ak edo 16:00ak aldera berriro bizikletak hartu eta Berriaturantz itzuliko dira. Hori bai, itzuleran, han edo hemen lo egiten geratuko dira, baina lo kalean egingo dute. “Non lo egingo dugun ez dakigu, baina geratzen garen lekuan geratuta ere, kalean lo egingo dugu. Ekintza hau abentura bat da, biziraupeneko abentura bat”. Eta zer edo zer atseden hartu eta gero, itzulerako bideari berrekingo diote.
Aurreikuspenen arabera, domekan [uztailak 25] 13:00ak edo 13:30ak inguruan ailegatuko dira Berriatuko plazara. “Nahi duenak helmugara agertzea, baina ez da inolako ospakizunik egingo. Ez dago ezer antolatuta”.
Berriatuarra abenturazalea bada ere eta errepideko kilometro luzeek edota mendiak ikaratzen ez badute ere, Hiru Erregeen Mahaia jaisteak beldur apur bat ematen diola aitortu du. “Mokorra ez daukat ondo-ondo, eta eskubiko belaunean min hartzen dut. Jaitsierari errespetua diot”. Dena dela, erronkarako prest dago berriatuarra eta hori argi dio. Bide batez, gogorarazi du Eupadak by Helmugak proiektuak aurten abiarazitako Aspanovasen aldeko diru bilketak zabalik jarraitzen duela, eta herritarrak ekarpena egitera animatu ditu.
Beraz, Txakartegiri esker, beste behin ere Aspanovasen ikurrak eta elkartea ordezkatzen duen kolore berdeak Euskal Herria zeharkatu eta Hiru Erregeen Mahaiaren gailurra konkistatuko du.
