Etxebarrian erabakiko da kadeteen Bizkaiko txapelketa
Oraingoz, 58 txirrindulari bizkaitarrek eta 38 arabarrek eman dute izena. Guztira, 61 kilometro inguruko ibilbidea osatu beharko dute parte hartzaileek.
Datorren domekan [irailak 19] zeharkatuko ditu Lea-Artibaiko errepideak Etxebarriko IV. Sari Nagusia kadete mailako txirrindulari lasterketak. Orain dela bi urte modura, Bizkaiko txapelketa izango da, eta bertan erabakiko dira Bizkaiko kadete lehen eta bigarren mailetako txapeldunak.
Amets Txurruka Lagunartie eta Markina-Xemeingo Txirrindulari elkarteak Etxebarriko Udalaren laguntzaz antolatzen duen lasterketaren bai irteera eta baita helmuga ere Etxebarriko erdigunetik kanporago egongo dira jende pilaketak ekiditeko asmoz. Etxebarritik Barinagara doan bidean, gutxi gorabehera bidegorriaren sarrera dagoen ingurutik irtengo dira txirrindulariak, eta bertan egongo da helmuga ere. Irteera 11:00etan izango da, eta txirrindulariak 12:30 alderako helmugara ailegatuko direla aurreikusten dute antolatzaileek.
Guztira, 61 kilometro inguruko ibilbidea osatu beharko dute parte hartzaileek. Etxebarritik irten eta Markina-Xemein, Berriatua, Ondarroa, Lekeitio, Gizaburuaga, Aulesti, Munitibar, Gontzugaraigana mendatea, Ziortza-Bolibar eta Markina-Xemein igaroko dituzte Etxebarriko helmugara heltzeko.
Sariak. Sari banaketa irteeratik hurre egingo da. Antolatzaileek jakitera eman dutenez, sariak egongo dira lehenengo hiru txirrindularientzat, eskualdeko lehen txirrindulariarentzat, taldekakoa, eta gainera, Bizkaiko lehen eta bigarren urteko txapeldunen mailotak ere banatuko dira.
COVID-19 egoera dela eta osasun neurriak errespetatzeko deia egin dute antolatzaileek. “Egoerak hobera egin badu ere, maskarekin ibiltzea gomendatzen dugu, jende asko ibiliko delako”. Bestalde, egoera dela eta lasterketa antolatzen laguntzeko boluntarioak aurkitzea zail dagoela gaineratu dute, eta boluntarioak eskertuko dituztela azpimarratu dute. “Bateren bat laguntzeko prest egongo balitz jarri dadila kontaktuan txirrindulari elkarteetakoekin”.
Lau urte eta gero, Etxebarriko Sari Nagusia klasiko bihurtu da jada, eta Bizkaiko txapelketa izatetik datorren urtean Euskadiko txapelketara jauzia ematea nahi dutela iragarri dute antolatzaileek. Domekako lasterketa uztailean egitekoak ziren eta 150 txirrindularik baino gehiagok eman zuten izena parte hartzeko, inoizko gehien. Datorren domekan gutxiago izango direla uste dute antolatzaileek. Oraingoz, 58 txirrindulari bizkaitarrek eta 38 arabarrek eman dute izena. Eskualdeko txirrindulariak ere badaude tartean, Etxebarriko Alain Txurruka eta Markina-Xemeingo Iurdan Garcia eta Jon Elorriaga besteak beste.
