Iker Badiola ikertzaile ondarrutarraren hitzaldia, Beikozinin
Hitzaldia Zientziaren Giltzak elkarteak antolatuta dago eta 18:30ean hasiko da.
Iker Badiola, artxiboko irudian. Argazkia: EHU. Ondarroako Zientziaren Giltzak elkarteak ikasturteko lehendabiziko hitzaldia dakar astelehenerako [irailak 20]. Orain arte modura, ikasturtea ondarrutar baten hitzaldiagaz hasiko dute. Hala, Iker Badiola Etxaburu ikertzaileak Minbizia osatzen? COVID-a osatzen? hitzaldia eskainiko du, 18:30ean, Ondarroako Beikozinin. Lekuak mugatuta egongo dira.
Minbiziaren istorioa zeluletatik abiatuta kontatuko du Badiolak. «Gure gorputzeko adreiluak zelulak dira; bilioika zelulen batura baino ez gara. Zelula horiek elkarlanean eta armonian bizi dira, eta bakar baten gaiztotzeak sor dezake minbizia».
Metastasia moduko prozesuak ahalbidetzen dituzten baldintzak ere azalduko ditu ondarrutarrak. Amaitzeko, minbizia eta COVID-19aren arteko harremana eta terapiak azalduko ditu.
