Pilota jaialdia egongo da Etxebarrian
Barikuan [irailak 17] jokatuko da COVIDa dela-eta uztailean atzeratu zuten jaialdia. 18:00etan hasiko dira pala, esku pilota eta zesta-punta norgehiagokak.
Pilota zaleek jaialdi handi batez gozatzeko aukera izango dute barikuan [irailak 17] Etxebarrian. Etxebarriko Udalak antolatuta, pala, esku pilota eta zesta-punta norgehiagokak jokatuko dira udalerriko frontoi nagusian.
Uztaileko sanandresetarako prestatu zuen jaialdia udalak, baina sasoi horretan Lea-Artibai eskualdean COVID-19 pandemiaren intzidentzia tasa altua zegoela-eta atzeratzea erabaki zuten. Atzeratutako jaialdi hori jokatuko da, beraz, barikuan, 18:00etan hasita.
Jaialdia pala partida bategaz hasiko da, eta horretan Leire Etxaniz etxebarritarrak parte hartuko du. Etxanizek Leire Galdos izango du bikote, eta Etxanizek eta Galdosek Amaia Irazustabarrena eta Maider Mendizabal izango dituzte aurkari.
Palako partida amaitutakoan, esku pilotako partida hasiko da. Hor ere eskualdeko pilotari bik jokatuko dute, Andoni Aretxabaleta markina-xemeindarrak eta Endika Uriondo gizaburuagarrak. Elkarren aurka ariko dira eskualdekoak, izan ere, Elordi-Uriondo eta Salaberria-Aretxabaleta bikoteak neurtuko dira.
Eta, amaitzeko, zesta-punta partida bat jokatuko dute Etxebarriko Antxonek eta Berriatuko Lekuek Markina-Xemeingo Arbe eta Ibarluzearen kontra.
