Elkarretaratzeak egingo dituzte Lekeition eta Ondarroan, Sarek deituta
Zapatuan Arrasaten egitekoa zen manifestazioa bertan behera utzi eta Euskal Herriko plaza guztietan, bizi osorako zigorren aurka eta giza eskubideen, elkarbizitzaren eta konponbidearen alde egitera deitu du Sarek.
Euskal presoen eskubideen aldeko mugimenduak zigor luzeen eta salbuespen legediaren aurka egiteko manifestazioa zeukan deituta zapaturako [irailak 18] Arrasaten. Baina “konfrontazio espaziorik ez elikatzeko”, manifestazioa bertan behera utzi dute. Dena dela, aldarriari eutsi nahi diete, eta elkarretaratzera deitu dute Euskal Herriko plaza guztietan, bizi osorako zigorren aurka eta giza eskubideen, elkarbizitzaren eta konponbidearen alde. Deialdia presazkoa izan da, eta laster joango dira mobilizazioak iragartzen. Ondarroan eta Lekeition bai egingo dituzte mobilizazioak; bi herrietan zapatuan [irailak 18] 13:00etan egingo dituzte elkarretaratzeak. Lekeition Eskolapean batuko dira, eta Ondarroan Alamedan.
Joseba Azkarraga eta Bego Atxa Sareko bozeramaileek salatu dute aste hauetan “presio izendaezina” jasan dutela Arrasaten euskal presoen eskubideen alde lan egiten duten pertsonek. Taldearen ustez, euskal presoen alorrean “une historikoa” da oraingoa, egin diren urratsez balorazio positiboa egin izan dute, eta, horregatik, «harridura osoz» hartu dituzte arlo politiko eta mediatikoan plazaratu diren «jarrerak»: «Erantzukizunik gabeko jarrerak dira, eta indartu egiten dituzte espetxe politikan edozein aldaketa errefusatzen duten horien jarrerak, aurrerapauso horiek gerarazteko presioa eta manipulazioa —biktimen mina modu arbuiagarrian erabilita, kontrakoaren aurkako arma gisa erabiltzeraino— baliatu dituzten horien jarrerak». Sarek adierazi du haiek ez direla «inoiz» ibiliko «jarrera» horietan.
