Lekeitioko Konpainia plazako botiloiek bizilagunen kexak eragin dituzte
Arazoari konponbide bat ematea eskatu diote Lekeitioko Udalari. Zaratak eta zabor pilaketak ezinegona eragin dute auzotarren artean.
Konpainia eliza aurrea zikinkeriaz beteta. Lekeitioko Resurreccion Maria de Azkue eta Apalloa kaleetako bizilagunek idatzi bat erregistratu dute udaletxean Konpainia elizaren aurreko plazan egiten diren botiloiak direla-eta “behin eta berriz” jasaten ari diren eragozpenak salatzeko. Auzotarrek azaldu dutenez, “bariku eta zapatuetan, ehunka pertsona batzen dira inguru horretan, goizaldeko ordu txikiak arte, eta jende pilaketa horrek zarata eta zikinkeria eragiten ditu”.
Auzotarrek azaldu dutenez, “atseden hartzea ezinezkoa da”; izan ere, jende pilaketak eragiten duten zaratagaz gainera musika ere jartzen dutela esan dute. Auzokide horien esanetan, “jasanezina” da bizitzen ari direna: “zarataz gainera, astebururo pixa eta gonbituak izaten ditugu atarietan eta inguru guztia apurtutako botilaz eta beirazko edalontziez eta zikinkeriaz beteta egoten da”.
Konpainia plazako bizilagunek hilak daramatzate botiloia eta horren ondorioak pairatzen. Joan den maiatzetik errepikatzen den arazoa dela zehaztu dute. “Plaza guztia eta Konpainiako eskailerak jendez beteta egoten dira. Jaietan ere jendez beteta egon da, baina jaietan baino hurrengo asteburuan pilatu zen jende gehiago eta iskanbilak egon ziren”.
Hori guztia dela eta, kaltetutako bizilagunek jende pilaketa eta botiloiei konponbide bat emateko eskaria egin diote udalari: “egoera jasanezin honi amaiera ematea eskatzen diogu”. Aste honetan bigarren idatzia aurkeztu dute udaletxean. “Uztailaren 12an aurkeztu genuen lehenengo jakinarazpena, eta arazoa ez dela konpontzen ikusita bigarrena aurkeztu genuen martitzenean [irailak 21]”. Bigarren salaketa honetan 40 bizilagun elkartu dira, eta guztien sinadurak gehitu dituzte eskarira.
Kaltetutako bizilagunek “babesik barik” sentitzen direla ere azpimarratu dute: “Deitzen ez badugu ez da inor agertzen, eta deitu arren handik bi ordutara agertzen dira jendea kanporatzera”. Arazoa gutxitzen joan beharrean “larriagotu” egin dela diote auzotarrek, eta beldur direla diote gune hori “betirako botiloirako topaleku” bihurtuko ote den. “Berriro eskatzen diogu udalari berehala konpon ditzala botiloiek sortutako arazo larriak. Ezin da onartu horrelakorik inon gertatzea, baina are gutxiago alde zaharreko erdiguneko plaza batean”.
Azken asteetan jasotako irudiek bizilagunek astebururo etxetik ikusten duten egoera islatzen dute:
