200 korrikalarik baino gehiagok izena eman dute Ondarru-Lekitto Kostaldeko Lasterketan
Zapatuan [irailak 25] egingo duten lasterketan parte hartzeko izen ematea zabalik dago gaur [irailailak 23] gauerdira arte. Momentuz 230 korrikalari daude izena emanda.
V. Ondarru-Lekitto Kostaldeko Lasterketa lehiatuko dute zapatuan [irailak 25]. Parte hartzaileak 17:00etan Ondarroako Itsasaurre plazatik aterako dira, eta helmuga Lekeitioko Independentzia plazan egongo da. Bertan parte hartu nahi dutenek gaur [irailak 23] gauerdira arte izena eman ahal dute herrikrosaren webgunean. Gaur gaurkoz 230 korrikalarik izena eman dute, eta gehiez ere 250 parte hartzaile egon ahal dira.
Lekeitioko Tximista Atletismo Taldeak antolatzen duen probaren ibilbidea 16 kilometrokoa da, eta lasterketak iraun bitartean kostaldeko errepidea itxiko dute. Hain zuzen, 16:40an Lekeitiotik Ondarroarako noranzkoan itxiko dute bidea, eta 17:00tan Lekeitiorako noranzkoan. “Bide osoa itxiko da, eta ordu tarte horretan Mendexa eta Asterrikatik ere ez da kostako errepidera irteteko aukerarik egongo. Berandu jota, 19:00etan zabalduko da errepidea. Lasterketako eskoba pasatu ahala zabaltzen joango da”, azaldu dute antolatzaileek. 100 bat laguntzailek kontrolatuko dituzte Ondarroa, Lekeitio eta errepide guztiko bide gurutzeak.
Joan-etorriko autobus zerbitzua eskainiko dute antolatzaileek aringa-aringalarientzat
Halaber, bi udalerriotako zirkulazioan ere eragina edukiko du lasterketak. Ondarroako herri barrua 16:45etik 17:30era arte itxita egongo da, eta Lekeition 17:45etik 19:00ak arte kale batzuk itxiko dituzte.
Bestalde, parte hartuko duten korrikalarientzat autobus zerbitzua eskainiko du antolakuntzak. 15:00tan hasita Lekeitiotik Ondarroara autobusak bete ahala irtengo dira. Azken autobusa 16:00ak aurretik irtengo duela jakitera eman dute. Bueltan, berriz, 19:30ean irtengo dira Lekeitiotik Ondarroara. “Kontsigna zerbitzua egongo da irteeran (Lekeition jasotzeko) eta helmugan: 14:30tik Lekeition eta 15:30tik Ondarroan”.
Taldekako saria. Bestalde, sariei dagokienez, lehenengo hiru emakumezkoak eta gizonezkoak saritzeaz gain, Lea-Artibai mailako sariak ere banatuko dituzte, lehenengo hiru sailkatuentzat eta baita taldekako sari bereziak ere: “Herri bereko lehenengo helmugaratzen diren lau emakumeek edota lau gizonezkoek sari hori irabazteko aukera edukiko dute”. Era berean, parte hartzaile guztiei kamiseta bana ere emango diete opari.
2019ko lasterketa Yasshine Bih Bih bilbotarrak eta Majida Maayouf gasteiztarrak irabazi zuten (iaz ez zuten egin pandemiagatik), eta eskualdeko azkarrenak Ander Okamika lekeitiarra eta Ioana Osa ondarrutarra izan ziren. Herri bereko lehen lau neska eta lehen lau mutilen taldekako sariei dagokienez, mutiletan Lekeitiok eraman zuen saria (Ander Okamika, Ibon San Migel, Iker Hormaetxea eta Ibon Bengoetxea), eta nesketan, berriz, Ondarroak (Ioana Osa, Leire Martin, Dunixe Burgoa, Eneritz Basurko).
