36ko gerran Etxebarrian hildako herritarrak gogora ekarriko ditu Ahaztuen Oroimena elkarteak
Memoria Lekuak ekimena jarri du martxan elkarteak. Urriaren 8an egingo dute aurkezpena.
Ahaztuen Oroimena elkartekoak eta 36ko gerran hil ziren etxebarritar batzuen senideak. Frontean hildako etxebarritarrez gain, 36ko gerraren ondorioz hil ziren beste herritar batzuk ere gogora ekarri nahi ditu Ahaztuen Oroimena elkarteak memoria historiko “kolektibo eta oso bat” osatu asmoz. Helburu horregaz Memoria Lekuak ekimena jarri du martxan elkarteak, eta horren bidez, Etxebarrian, 36 gerrak hil zituen herritarrak gogora ekarri, omendu eta haiei gertatutakoa transmititu nahi dute: “Urteetako isiltasunari, izen abizenak eta lekuak jartzeko beharra mahai gaineratu nahi dugu”.
Alde batetik, 36ko gerran frontetik kanpo Etxebarrian hil zirenen zerrenda bat osatu eta haiei gertatutakoa ikertu eta jaso dute artxiboetako informazio eta senide eta lekukoen testigantzen bidez, eta 36ko gerraren parte diren istorio horiekin guztiekin liburuxka bat osatu dute. Oraingoz, zortzi hildakoren informazioa jaso dute, baina unean unean burutzen ari diren ikerketek aurrerago izen gehiago ekar ditzaketela azaldu dute, eta zerrenda hori beraz, irekita dago.
Bestalde, 36ko gerrak hil zituen herritarren memoria lekuak ere sortu nahi dituzte. Horretarako lau plaka edo panel informatibo jarriko dituzte herriko gune ezberdinetan, heriotza horietako batzuk gertatu ziren lekuetan hain zuzen ere. Plaka bakoitzak QR kode bat eramango du informazio gehiago eskuratu ahal izateko.
Ahaztuen Oroimena elkartekoek aurreratu dutenez txostenean edo liburuxkan hildako guztien deskribapena jaso dute batena izan ezik, orain dela gutxi eduki dute-eta bere berri. Horrez gain, jarriko dituzten lau plakei buruzko informazioa ere azaltzen dute. Txostena interaktiboa dela gaineratu dute, seinale edo panel bakoitzaz gain 1936ko gertaeren mapa orokorrerako lotura ere badauka.
Memoria Lekuak ekimena eta 36ko gerran hil ziren etxebarritar haiei gertatutakoa ezagutzera emateko aurkezpen bat egingo du Ahaztuen Oroimena elkarteak urriaren 8an, 18:30ean, Etxebarriko kultur aretoan. Bideo bat ere prestatu dute aurkezpenerako.
