Bi eguneko dolua eta beste mobilizazio bat, hildako arrantzalearen heriotza salatzeko
Senegaldarren elkarteak (Sangomar) domekan [urriak 3] 13:00etan Alamedan batzera deitu du. Laneko segurtasuna eta osasuna arrantza sektorearen lehentasunak izatea exijitu dute sindikatuek. Udalak lan istripu guztiak salatzeko adierazpen instituzionala onartu du.
Ondarroako arrantzalearen heriotza salatzeko gaur goizean Ondarroan egindako elkarretaratzea Ondarroako Kaxarra arrasteontzian lanean ari zen marinelaren heriotza salatzeko elkarretaratze jendetsua egin dute gaur [urriak 1] Ondarroako portu sarreran. Hildakoaren senide eta lagunei elkartasuna adierazteaz batera, laneko segurtasuna eta osasuna arrantza sektorearen lehentasunak izatea exijitu dute sindikatuek. Ezbeharra salatzeko domekarako [urriak 3] beste mobilizazio bat ere deitu du Sangomar senegaldarren elkarteak; 13:00etan Alamedan batzera deitu dute. Horrez gain, udalak bi eguneko dolua ezarri du, eta herritarrei lan istripua salatzeko egingo diren mobilizazioetan parte hartzeko dei egin die.
Gehiengo sindikala: “Istripu larriak gertatzen dira urtero arrantza sektorean. Itsasontzietako segurtasun neurriak egiaztatzeko eta horien jarraipena egiteko giza baliabideak falta dira”
Lan istripua salatzeaz gain, ardurak ere exijitu dituzte; heriotzak eta istripuak saihesteko “benetako politikak” eskatu dizkiete erakundeei. Gehiengo sindikalak aho batez egin ditu aldarrikapenak: “Aski ezagunak dira arrantza sektorearen lan baldintza eskasak eta gogorrak, eta oso segurtasun neurri gutxigaz lan egiten da. Itsasontzi barruko prebentzioa ez da lehentasunezko gaia, eta, ondorioz, istripu larriak gertatzen dira urtero sektore horretan. Itsasontzietako segurtasun neurriak egiaztatzeko eta horien jarraipena egiteko giza baliabideak falta dira”.
Bi dolu egun ezartzeaz gain, udalak adierazpen instituzionala ere onartu du. “Ondarroako Udalak salatu nahi du istripuak, kosta ahala kosta, eta denaren gainetik saihestu behar direla. Edozein lanetan lan segurtasunak lehentasuna eduki behar du”. Lan istripuak sistema ekonomiko-sozialaren “egiturazko arazo” bilakatu direla esan eta erakunde guztiei eskatu die lan arriskuen prebentzioan jardunbide egokiei buruzko proiektuetan laguntzeko. Horrez gain, esan dute hildakoaren senide eta lagunei beharrezkoak diren izapide guztietan lagunduko dietela. “Pedro Lasarte Iparragirre Aniztasun zinegotzia komunitate senegaldarrak Ondarroan dituen ordezkariekin etengabe harremanetan dago beharrezkoa den guztian laguntzeko”.
Herritarraren heriotza zerk eragin duen argitzeko bitartekoak ere jarriko dituela esan du udalak, eta lan istripua salatzeko egingo diren elkarretaratze guztiekin bat egiteko eskatu die herritarrei. “Udalak bat egingo du domekan [urriak 3] 13:00etan Alamedan egingo den mobilizazioagaz”.
Ezbeharra. Lan istripua martitzenean [irailak 28] gertatu zen, 23:45ak aldera, eta une horretan itsasontzia Frantziako kostaldeko uretan ari zen arrantzan, lehorretik 6 bat miliatara. Lekukoen arabera, sarea uretaratzeko maniobratzen ari zirela sarea eusten duen kakoetako bat hautsi eta kable handi batek jota zauritu zen 40 urteko arrantzalea.
Arrantzalea ez zen bat-batean hil. “Kolpearen ondorioz besoa hautsi eta saihets aldean mina hartu zuen. Une hartan kontziente zegoen, eta osasun protokoloa aktibatu ostean, besoan ferula bat eta lepoko bat ipinita logelara eraman zuten; ontziak ere porturako bidea hartu zuen. Baina 01:00ak pasatxo zirenean haren egoerak okerrera egin zuen, eta arnasarik hartzen ez zuela ikusirik, telefonoz zerbitzu medikuek emandako gomendioak jarraituz erreanimatzen saiatu ziren, baina ezin izan zuten ezer egin”. Chemaipa enpresako arrasteontzia 10:00ak inguruan sartu zen Ondarroako portura.
