VI. Marabilli Sormen Festibala 2023an egingo da
Esan dute 2023rako utzi dutela indarra hartzeko denbora behar dutelako: "Gauzak gogoz, tentuz eta maitasunez egitea gustuko dugu, presarik gabe".
Ondarroako Marabilli Sormen Festibala antolatzen duten Manuelistek gaur [urriak 4] zabaldu dutenez, VI. Marabilli Sormen Festibala 2023an egingo da, eta ez 2022an. “Aurten ez dago jaialdirik ezta datorren urtean ere. Baina 2023an bai. Aurtengoa argi dago, pandemiak ez digu utzi gauzak behar bezala antolatzen. Jaialdi bat bukatu eta bestea pentsatzen hasten gara, eta ezin izan da, mundu guztiak bezala, beste lehentasun batzuk genituelako”.
Esan dute 2023rako utzi dutela ez dituztelako maite urte bikoitiak. “Itxiak dira, perfektuegiak dira”. Eta gainera Korrika ere urte bakoitietan izaten dela eta eurek ere Korrika maite dutela esan dute, nahiz eta pandemiaren eraginez Korrika 2022an egingo den. “Aitzakiak albo batera utzita, denbora behar dugu indarra hartzeko, gauzak gogoz, tentuz eta maitasunez egitea gustuko dugu, presarik gabe. Horrez gain, pixkat alferrak ere bagarelako. Ez al da sormena nagikeriatik eta asperduratik ateratzen? Orduan, ba horixe, Marabilli 6 2023an”.
2019an egindako V. Marabilli Sormen Festibalaren irudiak:
