Lea-Artibaikoak ere Bertsolari Gazteen 29. BBK Sariketan ariko dira
Txapelketa astelehenean [urriak 18] hasiko da, eta finala azaroaren 29an jokatuko da, Bilbon. Lea-Artibaikoek urriaren 25ean jokatuko dute saioa, Gueñesen.
Ione Narbaiza Bizkaiko Bertsozale Elkarteko ordezkaria, Koldo Bilbao BBKko Kultura arloko arduraduna eta Oihana Bartra bertsolaria, txapelketaren aurkezpenean. Argazkia: Bizkaiko Bertsozale Elkartea. Bertsolari Gazteen 29. BBK Sariketan 55 bertsolari inguruk parte hartuko dute, eta beste urte batez, Lea-Artibaiko bertsolari gazteek ere parte hartuko dute. Bizkaiko eskualde bakoitzak talde bat edukiko du. Beraz, zortzi talde ariko dira lehian: Lea-Artibai, Busturialdea, Durangaldea, Arratia, Enkarterri/Ezkerraldea, Hego Uribe, Uribe-Butroe eta Uribe-Kosta.
Taldekako txapelketa denez, talde bakoitzean gutxienez sei bertsolari egongo dira; A mailako (18 urtera artekoak, horiek barne) hiru bertsolari eta B mailako (19 urtetik 26 urtera artekoak) beste hiru. “Txapelketaren ezaugarri nagusienetako bat da taldekako txapelketa dela. Beraz, talde moduan baloratuko da, eta saio bakoitzean puntu gehien lortzen dituen taldea finalaurrekoetara pasatuko da”.
Guztira lau kanporaketa saio, finalaurreko bi eta finala jokatuko dira. Aurten, baina, Lea-Artibain ez da kanporaketa saiorik ezta finalaurrekorik ere jokatuko. Hemen egutegia:
- Kanporaketa saioak:
- (1) Urriak 18, Leioa: 10:00etan, Betiko ikastolan. Taldeak: Uribe Kosta eta Durangaldea.
- (2) Urriak 20, Mungia: 10:30ean, Torrebillelan. Taldeak: Uribe Butroe eta Arratia.
- (3) Urriak 25, Gueñes: 10:30ean, Sodupeko kultur etxean. Taldeak: Enkarterri/Ezkerraldea eta Lea-Artibai.
- (4) Urriak 27, Bilbo: 10:30ean, Urretxindorra ikastolan. Taldeak: Hego Uribe eta Busturialdea.
- Finalaurrekoak:
- (1) Azaroak 15, Abadiño: 10:30ean, institutuan. Taldeak: 1. eta 2. saioetako irabazleak.
- (2) Azaroak 15, Gernika-Lumo: 10:30ean, Barrutialde institutuan. Taldeak: 3. eta 4. saioetako irabazleak.
- Finala (azaroak 29, Bilbo): 18:00etan, BBK Aretoan. Taldeak: 1. eta 2. finalaurrekoetako irabazleak.
Saioak eskola orduetan egingo badira ere, edozein herritarrek ikusi ahal dituela esan dute. Sariari dagokionez, aurreratu dute taldeko plan bat izango dela saria. “Finalistek garaikurrak jasoko dituzte, baina sari nagusia egun osoko plana izango da”.
