Aulestiko plaza, herriko kultur aniztasunaren erakusgarri
Hainbeste lagun batu dira gaur [urriak 23] goizean Aulestiko plazan ospatu den kulturarteko Topaketan parte hartzeko. Udalerrian bizi diren herrialde desberdinetako herritarren kultura eta gastronomia ezagutzeko aukera eman dute topaketek.
Bilboko Fraternidad Cruceñak Boliviako Chovena dantza dantzatu du. Herrian bizi diren jatorri desberdinetako bizilagunen topagune bihurtu da gaur [urriak 23] goizean Aulestiko plaza. Brasil, Paraguay, Bolivia, Argentina, Peru, Mexiko edota Marokotik Aulestira bizitzera etorritako jendea eta Euskal Herrian zein Aulestin jaiotakoak elkartu dira, herrian pilatzen den kultura-aniztasuna plazan erakusteko asmoz. Herrialde desberdinetako argazki, objektu eta jantzien erakusketagaz gainera, herrialde ezberdinetako janariak ezagutu eta dasdatzeko aukera egon da, eta azken hori, batez ere, gustura hartu dute plazan bildutakoek.
Mani zopa, yuca-sonsoa, Cuñape, Mani freskagarria, Mocochinchi freskagarria, Loxinha, Ojaldrak edota cuscus berdura egon dira aukeran plazaren inguruan kokatutako mahaietan. Gazi zein gozo artean, Aulestiko bizilagunek elkar hobeto ezagutzeko aukera eduki dute, eta giro onik ez da falta izan. Kontu kontari ibili dira batzuk eta besteak, errezeten inguruan berbetan.
Ekitaldia borobiltzeko, gainera, dantza bi eskaini dituzte plazan; Lekeition bizi den nikaraguar batek Mate Amargo dantzatu du, eta Bilboko Fraternidad Cruceñak Boliviako Chovena dantza.
Kulturarteko jardunaldietako gaurko ekintzagaz gainera, eskolan ere landu dute gaia aste osoan, egunez egun era askotako ekintzak gauzatuz. Horien adierazpen dotore bat egon da gaur arkuetan jarrita.
Ibilbidea. Gaurko jardunaldia, hala ere, 11:00etan hasi da. Aulestiko herriguneko eraikinik eta espaziorik interesgarrienak ezagutzera emateko QR ibilbide bat diseinatu dute, herriko kaleetan zehar hilerriraino heltzen dena, eta gaur eman dute ezagutzera.
Denetara 17 QR kode ipini dituzte herriguneko eraikinik eta espaziorik interesgarrienen garrantzia historikoa eta artistikoa azpimarratzeko eta herria hobeto ezagutzera emateko helburuagaz, eta Jabier Aranguena Aulestiko Ondare Taldeko kidearen laguntzagaz QR kodeak probatu eta ibilbide horretan dauden eraikin esanguratsuenen xehetasunak ezagutzeko aukera egon da.
QR Kodeak finkoak izango direla argitu du Aranguenak, eta horien bidez, bakoitzak nahi duenean egin ahalko du ibilbidea. Telefono mugikorraren bidez kodea irakurri eta informazioa irakurri edo entzun ere egin ahalko da.
Frontoian hasi eta hilerrirainoko ibilbidea egin dute gaurko parte hartzaileek Aulestia dorrea, Mulutegi, Argiñeta, plaza, udaletxea, eliza, Arrangiz, kaleko etxeak eta beste hainbat eraikin interesgarri bisitatuz.
