Helmugak, Aspanovasen olatu berdea kilometroz kilometro zabaltzen
Ander Txakartegik esan du asteburuan Aspanovasen alde egindako ekintza solidarioa ondo joan dela: «Polita izan da». Jende askok parte hartu duela esan dute.
Abenturazaleak, Jaizkibelen. Argazkia: Helmugak Ander Txakartegik, Mikel Motek, Oier Aldabaldetrekuk eta Igor Antonek asteburuan Aspanovasen alde egindako zeharkaldia ondo joan da, eta hala adierazi dute abenturazaleek: «Polita izan da». Giro freskoa eduki zutela baina Euskal Herriko kostalde osoa zeharkatzeko ia 500 kilometroko ibilbidea gustura egin dutela esan dute. Helmugak proiektuko kideei esker, beraz, Aspanovasen kolore berdea oraindik ere txoko gehiagotara heldu da.
Abenturazaleek argi utzi dute ekintza solidarioan jende askok parte hartu duela. «Asko izan dira helburu solidarioagaz bat egin eta han edo hemen kilometro batzuk gugaz batera egitera animatu direnak». Eta horiei guztiei eskerrak eman nahi izan dizkiete.
Abenturazaleak, Mikelontxoren aitagaz, Portugaleten. Argazkia: Helmugak
Zapatu goizaldean atera ziren Berriatutik, eta domeka eguerdian ailegatu ziren berriro ere Berriatura, 480 kilometro eta 7.000 metroko desnibel metatua zeukan ibilbidea eginda.
[ASPANOVASEN ALDEKO DIRU EKARPENA EGIN]
Portugaleten gertatutakoa. Gertaera berezi bat ere eduki zuten. Izan ere, Portugaleten duela bi urte 13 urtegaz minbiziagaz hil zen Mikelontxonen aitagaz (Mikel Peña) bat egin zuten. «Mikelontxonen aita minbizia ikertzen jarraitzeko aldarrikatzeko 24 ordu oinez egiteko erronka ari zen egiten Portugaleten. Beraz, bi ekintza solidariok bat egin zuten». Portugaleteko Bizkaiko Zubia zeharkatzea ere «oso polita» izan zela esan dute. «Iluntzea zen, giro ona egiten zuen… Berezia izan zen. Markel Irizar ere familiagaz agertu zen».
Abenturazaleak, Aspanovasek Crucesen daukan egoitzan. Argazkia: Helmugak.
Itzuleran, gainera, Aspanovasek Cruzesen daukan egoitzan geldialdia egin zuten abenturazaleek. «Lokal berria erakutsi ziguten; pozik hartu gintuzten».
Helmuga, «hunkigarria». Ibilbide osoa berezia eta polita izan bazen, helmuga are bereziagoa izan zen. Izan ere, Berriatuko plazan abenturazaleen zain zeudenen artean zeuden Yolanda Gestoso eta Igor Aldazabal ekainean zendu zen Ager Aldazabalen gurasoak. «Helduera oso hunkigarria izan zen», esan du Txakartegik.
[ASPANOVASEN ALDEKO DIRU EKARPENA EGIN]
Aurretik ere ekintza solidarioak egindakoa bada ere, Txakartegi 2020an hasi zen Aspanovasen aldeko ekintzak egiten; hasieratik Ager Aldazabal herritarrari eta haren senideei lagutzea izan da bere asmoa. Hala, #Agertxopirata proiektua sortu eta lau haizetara zabaldu zuen. Egiten duen horretan sinistuta, bihotz onak milaka kilometro egitera bultzatu du. Eta argi dio olatu berdeak ez daukala etenik. Izan ere, ekintza solidario bat amaitu orduko hurrengoan pentsatzen jartzen da, eta horretan dabil orain ere.
Abenturazaleak, helmugan, Ager Aldazabalen gurasoekin (Yolanda Gestoso eta Igor Aldazabal). Argazkia: Lander Andonegi.
Igor Anton eta Ander Txakartegi. Argazkia: Ander Zelaia.
