Josune Aramendik Bizkaiko Bertsolari Txapelketako finalaurrekoetarako txartela lortu du
Markina-xemeindarrak Galdakaoko finalaurrekoan kantatuko du azaroaren 27an. Xabat Galletebeitia Abaroa lekeitiarrak eta Nerea Ibarzabal Salegi markina-xemeindarrak ere finalaurrekoetan kantatuko dute.
Atzo [azaroak 7] arratsaldean Getxon jokatu zen Bizkaiko Bertsolari Txapelketaren seigarren eta azken kanporaketa irabazi zuen Josune Aramendik, eta markina-xemeindarra finalaurrekoetan kantuan ariko diren bertsolarietako bat izango da. Hiru finalaurreko izango dira guztira, eta sei bertsolari ariko dira saioko. Aramendigaz gainera, Lea-Artibaiko beste bertsolari bi daude finalaurrekoetan: Xabat Galletebeitia Abaroa lekeitiarra eta Nerea Ibarzabal Salegi markina-xemeindarra.
Josune Aramendi Perez bertsolari markina-xemeindarra Getxoko kanporaketan kantuan. Argazkia: Bizkaiko Bertsozale Elkartea
Atzoko saioan Enare Muniategi Etxabe (Gautegiz-Arteaga), Eneko Aldana Carrasco (Forua), Koldo Muñiz Aldamiz-Etxebarria (Forua) Malen Amenabar Larrañaga (Larrabetzu) eta Unai Mendiburu Valor (Algorta) bertsolariekin kantatu zuen Aramendik. Lan puntuagarri guztiak egin ostean, markina-xemeindarra izan zen puntu gehien batu zituena, 458 puntu hain zuzen ere. Beraz, Galdakaoko finalaurrekoan kantatuko du azaroaren 27an.
Beste bi finalaurrekoak Etxebarrian eta Larrabetzun izango dira. Lehenengo finalaurrekoa izango da Etxebarrikoa. Azaroaren 21ean izango da hitzaordua 17:00etan, frontoian. Bertan kantatuko duten sei bertsolariak ondorengoak izango dira:
- Miren Amuriza Plaza (Berriz)
- Onintza Enbeita Maguregi (Muxika)
- Ibon Ajuriagojeaskoa Garmendia (Gernika-Lumo)
- Imanol Uria Albizuri (Algorta)
- Gorka Pagonabarraga (Durango)
- Paule Ixiar Loizaga Legarra (Sopela)
Gai-jartzaile lanak, berriz, Zihara Enbeita Gardokik egingo ditu. Lea-Artibaiko bertsolaririk ez da egongo Etxebarrian. Esan bezala, Aramendik Galdakaon kantatuko du azaroaren 27an, 17:00etan Urreta kiroldegian, eta finalaurreko horretan ariko da baita Galletebeitia ere. Ibarzabal, aldiz, abenduaren 4an 17:00etan Larrabetzuko frontoian jokatuko den finalaurrekoan egongo da. Finala abenduaren 18an izango da Bilboko Bilbao Arenan.
