Astelehenean hasiko dira Ondarroako Erribera kalea asfaltatzen
Lanak direla eta, asteleheneko [azaroak 15] 08:00etatik aurrera Erribera kalea ibilgailuentzako itxita egongo da.
Ondarroako Udalak jakinarazi du astelehenean [azaroak 15] hasiko direla Erribera kalean adokina kendu eta asfalto inprimatua ipintzeko lanak. Lanek pare bat aste irautea aurreikusten dute. Ondorioz, asteleheneko [azaroak 15] 08:00etatik aurrera ibilgailuentzako itxita egongo da Erribera kalea. Lanak eguraldiak baldintzatuta daudela esan dute. Beraz, gerta liteke lanek bi aste baino gehiago irautea.
Zehatz esateko Nasa kalean dagoen moduko asfalto inprimatua ipiniko dute Erriberan. “Musika Eskolaren paretik Nasa kalerainoko behegaina aldatuko da”. Lanak Asfaltos Uribe enpresak egingo ditu.
Udalak esan du lanek inguru horretan bizi diren herritarren eta denda zein tabernen egunerokotasunean eragingo dutela. “Horregatik, udaletik espero da denen arteko koordinazioarekin ahalik eta eragin txikiena edukitzea”. Gaineratu dute Erribera kaleko behegaina aldatzea “beharrezkoa” dela, batez ere oinezkoentzako. “Gaur egun dagoen behegainak arazoak ematen ditu, batik bat mugikortasun arazoren bat dutenei, orgatxoa daramatenei edo umeen kotxeekin doazenei”.
Antiguarako bide zaharra. Bestetik, Antiguara joateko bide zaharraren azken zatia konpontzeko lanak barikuan [azaroak 12] hasiko dira; bide zaharraren azken zatia konponduko dutela esan dute. Lanek hiru aste iraungo dutela eta egiteko horretaz Egiguren S.L. enpresa arduratuko dela esan dute.
