Gaueko aisialdian eta jatetxeetan COVID ziurtagiria eskatzeko baimena galdegingo dio Jaurlaritzak justiziari
Intzidentzia tasa 150 baino altuagoa duten udalerrientzako neurri osagarriak aurkeztu ditu Jaurlaritzak. Egoera horretan dauden herrietan bertan behera geratu edo atzeratu egingo dira ekitaldiak, udalek prebentzio neurriak bermatzerik ez dagoela ikusten badute. Neurriak bihar [azaroak 17] sartuko dira indarrean.
«Ez goaz ondo eta neurriak indartu behar ditugu, atzera ez egiteko», esan du Gotzone Sagardui Osasun sailburuak gaur [azaroak 16] pandemiari aurre egiteko neurri murriztaile berriak aurkezteko agerraldian. Esan dutenez, gaueko aisialdirako lekuetan eta jatetxeetan COVID ziurtagiria eskatzeko baimena galdegingo dio EAEko Justizia Auzitegi Nagusiari. Neurriek 100.000 biztanleko 150 kasu baino gehiagoko tasa duten udalerriei eragingo liekete. HITZAren eremuan ondoak daude egoera horretan: Berriatua, Etxebarria, Lekeitio eta Mutriku. Ondokoak dira eguaztenean indarrean sartuko diren beste neurri osagarriak:
- 150etik gorako intzidentzia duen herrietan (biztanle kopurua edozein dela ere), bertan behera utzi edo atzeratu egingo dira ekitaldiak eta jaiak, udalek adierazten badute ezingo dituztela prebentzio neurriak bermatu, bereziki jana eta edana tartean daudenetan, horretarako maskara kendu behar delako.
- Neurriak indartu beharko dira bestelakoetan, barruan zein kanpoan: leku gehiago jarri, bideak ireki jendearen zirkulazioa arintzeko, eta mugatu jatekoak eta edatekoak emateko guneak. Ahal dela ekitaldiak kanpoan egiteko eskatu du.
- Bakarrik ura kontsumitu ahalko da barruan egiten diren ekitaldietan, kontzertuetan esaterako. Parte hartzaileek trazabilitatea ezartzen laguntzeko betebeharra edukiko dute.
[IKUS LEA-ARTIBAI ETA MUTRIKUKO EGOERA EPIDEMIOLOGIKOA]
Datu epidemiologikoak, astean bitan. Bestetik, esan dute aurrerantzean astean bitan argitaratuko dutela buletin epidemiologikoa, udalen lana errazteko: astelehenetan eta eguenetan argitaratuko dute.
Bakarrik ura kontsumitu ahalko da barruan egiten diren ekitaldietan, kontzertuetan esaterako. Parte hartzaileek betebeharra edukiko dute trazabilitatea ezartzen laguntzeko.
Neurri berriak bihar [azaroak 17] sartuko dira indarrean.
Une honetan ondokoak dira Araban, Bizkaian eta Gipuzkoan 150etik gorako tasa duten 5.000 biztanle baino gehiagoko herriak (baina neurriek biztanle gutxiago dituztenei ere eragingo diete):
- Araba: Agurain.
- Bizkaia: Bermeo, Durango, Elorrio, Ermua, Gernika-Lumo, Lekeitio, Trapagaran.
- Gipuzkoa: Astigarraga, Azpeitia, Beasain, Bergara, Donostia, Eibar, Elgoibar, Errenteria, Hernani, Irun, Lasarte-Oria, Lazkao, Legazpi, Mutriku, Oñati, Ordizia, Orio, Tolosa, Urretxu, Usurbil, Villabona, Zarautz, Zumarraga.
