Mutrikuko Gaztetxea bertsoz eta musikaz bete da asteburuan
Asteburuko bi ekintzek erantzun ona eduki dutela esan dute gazte asanbladako kideek. Datorren asteburua "bereziena" izango dela iragarri dute.
Mutrikuko Gaztetxearen 20. urteurrena ospatzen jarraitzen dute. Asteburuan bertso afariaz eta Jon Basagurenen kontzertuaz gozatzeko aukera eduki dituzte Gaztetxera hurreratu direnek. Gazte asanbladako kideek esan dutenez, erantzun ona eduki dute bi ekintzek. “Barikuan [azaroak 12] 50 bat lagun batu ginen bertso afarian eta domekan [azaroak 14] beste 40 lagun inguru batuko ginen kontzertuan”.
Eli Pagola eta Benat Gaztelumendi, Mutrikuko Gaztetxean eskainitako bertso afarian. Argazkia: MUGA.
Bertso afaria lagunarteko giro “ederrean” egin zutela eta Eli Pagola eta Beñat Gaztelumendik saio bikaina eskaini zutela adierazi dute. “Proposatu genien gaia ardatz hartuta, ondo moldatu ziren bertsotan; saio ederra eskaini zuten. Urteurrenaren harira bertso ederrak bota zituzten. Gaztetxeak 20 urte egin dituenez, gai denak Gaztetxearekin edo gazte asanbladarekin lotuta egon ziren; bertan gerta litezkeen egoera ezberdinak irudikatu zituzten bertsotan”. Jon Basagurenen kontzertuan ere giro ona nagusi izan zela gaineratu dute. “Ordubete inguruko kontzertua eskaini zuen, eta gustura geratu ginen denok”.
Jon Basagurenek Mutrikuko Gaztetxean eskainitako kontzertua. Argazkia: Irati Garagarza.
Azaroa osoan izango dira urteurrena ospatzeko ekintzak. Datorren asteburua “bereziena” izango dela aurreratu dute. Barikuan [azaroak 19], 18:00etan, asanblada irekia egingo dute Gaztetxean, eta ondoren, horma irudiaren margotzera abiatuko dira. Zapatuan [azaroak 20], berriz, Gaztetxe Eguna ospatuko dute; egun osoko egitaraua antolatu dute urteurrena goi-goitik ospatzeko.
