Ziortza-bolibartarrek Euskararen Eguneko egitaraua aurkeztu dute
14 urtera artekoentzako idatzizko kopla lehiaketa antolatu dute, eta 15 urtetik gorakoentzako esaera zahar eta esamoldeen lehiaketa. Azaroaren 26a da lanak aurkezteko azken eguna.
Euskararen Eguna abenduaren 3an bada ere, Ziortza-Bolibarren hasi dira egun horretarako motorrak berotzen. Hala, ume eta nagusientzako idatzizko lehiaketak abiarazi dituzte. Lehiaketen sari banaketa abenduaren 3an egingo dutela esan dute, eta horrez gain antzezlan bat ikusteko aukera ere egongo da.
Alde batetik Idatzizko Kopla Lehiaketa egingo dute. Hori, baina, 14 urtera arteko ume eta gaztetxoei zuzenduta dago. Bestetik, 15 urte eta hortik aurrerakoentzako idatzizko esaera zahar eta esamoldeen lehiaketa antolatu dute. Bi lehiaketak abian daude, eta esan dute azaroaren 26a dela lanak aurkezteko azken eguna. “Etxez etxe banatu dugun eskuorriaren atzeko aldean dago idazteko aukera, eta hori bete ondoren, parte hartzaileek udaletxeko postontzian utzi beharko dute”, esan dute udal ordezkariek. Irabazleen errigorako saskia jasoko dute sari legez.
Abenduaren 3ko ekintzak. Euskararen Egunean, ostera, Tonbola antzezlana egongo da frontoian, 19:00etan. Eta emanaldia eta gero bi lehiaketetako sari banaketa egingo dute.
